DILI, STLTIMORLESTE.com — Prezidente Repúblika (PR), José Ramos Horta hamutuk ho Doutór Braganza no Ministra Saúde, entrega ambulánsia rua ba Klinika Bairo Pite, Kareta rua ne’e apoiu husi Doador Ibrahim husi Abu Dhabi.
Prezidente Ramos Horta hatete, ambulánsia rua ne’e mak doasaun hosi Sr. Ibrahim, ema negósiu hosi Abu Dhabi, ne’ebé deside apoia servisu saúde iha Timor-Leste liuhosi kooperasaun ho Doutór Braganza.
“Ambulánsia rua ne’e mai hosi senhor ida iha Abu Dhabi, la’ós família real, maibé ema negósiu boot. Nia mai iha ne’e fulan Setembru tinan ida liu, no halo desizaun hamutuk ho Doutór Braganza atu mai ajuda Timor-Leste,” katak PR Horta.
Nia esplika katak, Doutór Braganza servisu voluntáriu iha Timor-Leste liu tinan 10, depois hosi esperiénsia servisu iha Alemaña no Inglaterra, inklui halo operasaun komplikadu iha Hospital Nasionál Guido Valadares (HNGV).
Prezidente Horta hatete, hosi relasaun no servisu voluntáriu Doutór Braganza, doadór Ibrahim deside oferese ambulánsia marka Toyota ho modelu foun no ekipamentu médiku emerjénsia kompletu.
“Ambulánsia sira ne’e foun no ekipamentu modernu. Folin sira bele to’o 13 miliaun ka liu tan, tanba kareta rua ne’e ekipamentu ho teknolojia no fasilidade médika kompletu,” hatete nia.
Aleinde nee entrega ambulánsia, Doutór Braganza sei kontinua hela iha Timor-Leste durante semana rua ka tolu tan atu fó formasaun ba médiku sira iha HNGV.
Prezidente Horta mos hatete katak, apoiu hosi Emiradus Árabes Unidus (EAU) ba Timor-Leste la’ós de’it iha área saúde, maibé inklui apoiu ba konstrusaun dormitoriú ba feto sira iha Palásiu Prezidensiál no apoiu sira seluk.
Nunee mos Doutór Braganza liu husi nia diskursu hatete, ambulánsia rua ne’e sei ajuda Klinika Bairo Pite atu aumenta kapasidade atendimentu ba komunidade, liuliu pasiente sira ne’ebé presiza asisténsia médika emerjénsia.
Nia hatete, ambulánsia rua ne’e ekipadu kompletu no bele konsidera hanesan “mini-klínika móvel”, tanba iha ekipamentu médiku ne’ebé permite ekipa saúde halo atendimentu ba pasiente iha dalan, iha fatin akontese dezastre ka emerjénsia, no iha laran ambulánsia rasik.
Nunee mos Prezidente Fundasaun Klinika Bairo Pite, Inácio do Santos hatete, apoiu hosi Doutór Braganza ba klinika ne’e la’ós foin daudaun, maibé hahú hosi 2012 no kontinua to’o agora.
“Tinan rua liubá, ita hetan doasaun hosi Doutór Braganza, simu ekipa ultrasaun. Tinan ida ne’e ita hetan suporta liuhosi Doutór Braganza no doadór Sr. Ibrahim, ne’ebé ohin Sr. Prezidente esplika ona, atu sosa ambulánsia rua ba suporta Klinika Bairo Pite,” katak Inácio.
Nia mos hatete, manutensaun Klinika Bairo Pite hetan apoiu hosi parte oioin. Antes, Primeiru-Ministru Kay Rala Xanana Gusmão apoia kareta Triton ida ba klinika ne’e atu apoia atividade manutensaun.
Iha tinan 2024, Ministériu Saúde mos aloka orsamentu atu sosa kareta ba Klinika Bairo Pite, inklui ambulánsia ida, ne’ebé manutensaun sai responsabilidade hosi klinika.
Agora, fundu ba manutensaun sira ne’e hetan suporta hosi Gabinete Sosiedade Sivil no Gabinete Vise-Primeiru-Ministru.
Inácio do Santos subliña katak, ambulánsia móvel rua ne’e sei sai rekursu importante ba Klinika Bairo Pite, tanba ekipa saúde bele lori atendimentu diretamente ba komunidade, la’ós de’it lori pasiente ba klinika.
Nia hatete, Ambulánsia móvel signifika katak iha ekipamentu kompletu hanesan mini-klínika ida. Tanba ne’e, bainhira ba foti pasiente, la’ós de’it transporta pasiente ba klinika, maibé médiku sira bele halo atendimentu kedas iha fatin ka iha laran ambulánsia.
(eme)
