DILI, STLTIMORLESTE.com — Konstrusaun maternidade foun Hospital Nasional Guido Valadares (HNGV) atinji ona 30% resin, ho apoiu Japaun liuhusi JICA, no preve entrega iha klaran 2027.
Diretor Servisu Apoiu Diagnóstiku no Terapêutiku HNGV, Vidal de Jesus Lopes hatete, progresu konstrusaun edifísiu maternidade foun iha HNGV atinji ona 30% resin.
Nia hatete katak, projetu ne’e hetan apoiu finanseiru husi Governu Japaun liuhusi Japan International Cooperation Agency (JICA), ho montante besik US$ 20 miliaun.
“Ne’e hau halo estimasaun deit, maibé atu klaru liután, parte téknika mak bele fó informasaun. Porvolta 30% ona, konstrusaun sei lao hela, no tentativamente iha klaran tinan 2027 bele entrega ona,” dehan Vidal ba jornalista iha HNGV, Bidau, Dili, Kuarta (02/09/2026).
Tuir nia, projetu ne’e la’ós deit konstrusaun edifísiu, maibé mos inklui fornese ekipamentu médiku no non-médiku atu suporta servisu saúde iha maternidade.
Vidal hatutan katak edifísiu maternidade foun sei lokaliza besik bloku Pediatria no área Saúde Maternu-Infantil, atu unidade sira ne’e fasilita koordenasaun no prestasaun servisu ba pasiente.
Entretantu tuir informasaun husi media sosial, konstrusaun edifísiu maternidade foun HNGV hahú ho serimónia lansamentu primeira-pedra iha 17 Agostu 2025, lideradu husi Primeiru-Ministru Kay Rala Xanana Gusmão.
Projetu ne’e hetan apoiu husi Governu Japaun liuhusi JICA, ho objetivu atu hadi’a infraestrutura no aumenta kapasidade servisu saúde maternu iha HNGV.
Edifísiu foun sei iha andar haat, inklui área obstetrísia, jinekolojia no enfermaria partu, ho kapasidade 76 kama ba inan isin-rua.
(dom)
