DILI, STLTIMORLESTE.com – Ministru Interiór (MI) louva PNTL tanba detein membru UPF ne’ebé deskonfia envolve iha kazu mate feto ida iha Tilomar.
Ministru Interiór Francisco da Costa Guterres hato’o apresiasaun ne’e iha Palásiu Governu, Kuarta (02/09/2026).
Nia dehan PNTL nia desizaun detein membru ne’ebé deskonfia komete krime hatudu disiplina no responsabilidade institusionál.
“PNTL foti desizaun hodi kaptura membru ne’e, tanba deskonfia envolve iha krime. Tanba ne’e, ita tenke louva PNTL,” hateten Francisco.
Ministru hateten, maioria membru PNTL kontinua fó laran ba servisu, maski iha membru balun ne’ebé komete sala.
Nia subliña katak membru instituisaun seguransa tenke proteje sidadaun, liuliu ema vulneravel, la’ós halakon ema nia vida.
“Membru instituisaun seguransa tenke proteje ema no sidadaun. Sira ne’ebé viola lei tenke simu konsekuénsia tuir prosesu,” hateten nia.
Francisco konfirma simu ona relatóriu kona-bá membru UPF ne’ebé deskonfia envolve iha kazu ne’e.
Nia hateten relatóriu ne’e entrega ona ba investigasaun kriminál, atu depois submete ba Ministériu Públiku.
“Relatóriu hetan ona. Agora entrega ba investigasaun kriminál, depois haruka ba Ministériu Públiku atu prosesa,” afirma nia.
Kona-bá kestaun administrativu, Ministru hateten PNTL sei foti medida tuir prosedimentu internu hasoru membru UPF ne’e.
Nia esplika katak prosesu judisiál sei determina responsabilidade kriminál, tanba kazu ne’e relasiona ho alegasaun oho ema.
Antes detensaun, autoridade prende ona arma ne’ebé membru UPF refere uza, tuir informasaun husi prosesu investigasaun.
Kazu ne’e akontese iha área Wetaba, Tilomar, Munisípiu Covalima, iha 25 Juñu 2026, envolve membru UPF no ema sivil.
Tuir informasaun, DSIK hala’o detensaun iha Segunda (31/08/2026), bazeia ba mandadu husi Tribunál Judisiál Primeira Instánsia Suai.
Arguidu na’in-haat, inklui membru UPF ida no membru SNI na’in-tolu, detein durante 72 oras iha sela PNTL Covalima.
Ohin, Kuarta (02/09/2026), autoridade seguransa submete arguidu na’in-haat ba Primeira Interogatóriu iha Tribunál Judisiál Primeira Instánsia Suai.
(jos)
