DILI, STLTIMORLESTE.com – Prezidente Repúblika (PR), José Ramos-Horta hatete, Monsenhor Martinho da Costa Lopes no Xanana Gusmão iha papel importante hametin relasaun entre Igreja Katólika no Rezisténsia Timorense durante períodu okupasaun Indonézia, hodi hamutuk luta ba ukun-rasik-an.
Prezidente Republika Jose Ramos Horta hato’o lia hirak ne’e ba jornalista sira iha Palásiu Prezidensiál Nicolau Lobato, Bairo Pité, Dili, Kuarta loraik (02/09/2026).
Prezidente hatete, Monsenhor Martinho da Costa Lopes mak hahú relasaun entre Rezisténsia no Igreja iha tempu ne’ebá, depois nia hasoru Xanana Gusmão iha Mehara.
“Hau koñese nia di’ak. Nia ema ida di’ak tebes. Nia mak hahú ho Maun Xanana relasaun rezisténsia ho Igreja. Sira hasoru malu iha Mehara. Iha momentu ne’ebá, Dom Martinho halo desizaun katak Igreja tenke tau nia an hamutuk ho luta ne’e,” dehan José Ramos Horta.
Ramos Horta mós relata katak nia no Monsenhor Martinho iha relasaun besik no kolaborasaun di’ak durante tempu Portugés, inklui liuhosi Jornal Seara no Dioseze Dili.
“Preladu Dom Martinho da Costa Lopes fila ba nia rai ne’ebé independente no livre. Nia sai husi Timor iha tinan 1991, antes akontesimentu Santa Cruz. Hau hasoru nia dala barak. Dala barak nia hela ho hau iha Nova York, iha hau nia apartamentu. Ami ba hamutuk iha fatin barak, inklui Alemanha, Nova York no fatin barak iha Europa. Hau sempre akompaña nia. Nia ema ida ne’ebé hau hadomi no respeita,” dehan Prezidente.
Monsenhor Martinho da Costa Lopes sai nu’udar figura importante iha istória Timor-Leste tanba nia defende direitu no dignidade povu Timoroan, no hato’o situasaun no sofrimentu povu ba komunidade internasionál durante períodu okupasaun.
Nu’udar Administradór Apostóliku Diocese Dili, Monsenhor Martinho sai mós nu’udar voz importante iha defesa direitu povu Timoroan liuhosi nia testemuñu no pozisaun pastorál.
Omenajen ba Monsenhor Martinho sei kontinua iha 3 Setembru 2026, iha Manatuto. Iha serimónia ne’e, Governu sei fó naran Ponte Manatuto tuir naran Monsenhor Martinho da Costa Lopes, ho inaugurasaun plaka komemorativa no bênsaun ponte.
Governu Repúblika Demokrátika Timor-Leste (RDTL) no Konferénsia Episkopál Timorense (KET) organiza serimónia ofisiál hodi simu no fó omenajen ba Preladu na’in haat, nu’udar forma ida hodi rekoñese sira-nia servisu pastorál, sakrifísiu no kontribuisaun ba Igreja Katólika, povu no istória Timor-Leste.
(eme)
