SURAKARTA, STLTIMORLESTE.com – Primeiru Ministru Timor-Leste, Kay Rala Xanana Gusmão, halao enkontru amizade ho Eis-Prezidente Repúblika Indonézia, Joko Widodo (Jokowi), iha rezidénsia privadu Jokowi nian, Rua Kutai Utara No. 01, Solo, Surakarta, Java Sentrál, Indonézia.
Enkontru nee rasik halao ih loron, Sesta Feira (04/09/2026).
Primeiru Ministru, Kay Rala Xanana Gusmão neebé hatais kamiza batik, too iha odamatan rezidénsia Eis-Prezidente da-7 Repúblika Indonézia, Joko Widodo (Jokowi)iha tuku 12:26 lokal Indonézia nian.
Iha odamatan uma nian, Jokowi neebé mós hatais kamiza batik, simu PM Xanana ho sorrisu no hatoo mós saudasaun amizade. La iha formalidade, sira nain-rua konversa oitoan molok tama bá rezidénsia, hodi hahú momentu enkontru ida neebé nakonu ho familiaridade no amizade.
Enkontru nee halao iha atmosfera relaxadu. PM Xanana ho eis Prezidente Jokowi koalia bá malu, hanoin fila-fali momentu sira neebé sira liu hamutuk ona, no fahe istória iha ambiente familiár. Iha momentu seluk, sira mós troka lembransa nuudár símbolu respeitu no amizade entre líder rua nee.
Maibé, momentu neebé halo enkontru nee sai espesiál liu-tán bainhira ekipa ida iha sala uma nian nee, toka múzika keroncong akompaña ho kanta múzika Bengawan Solo, ho nia kompozisaun hosi Gesang.
Kanta ida-nee, nuudár obra ida hosi obra múzika Indonézia nian neebé koñesidu, no halo Xanana Gusmão interresadu loos. Primeiru-Ministru Timor-Leste nee laós deit rona, maibé mós partisipa hodi kanta hamutuk too kanta nee remata.
Iha meza, eis Prezidente Jokowi prepara hahán oioin bá nia konvidadu, inklui kwetiau ka makaraun hosi arroz achatado, bebek peking ka Pato à Pequim, fuyunghai no naan karau lada metan. Hahán oioin nee aumenta tán atmosfera familiár no halo enkontru nee sai simples, maibé nakonu ho istória no amizade.
Iha tempu hán hamutuk nee, Xanana Gusmão hatoo nia admirasaun bá lideransa Jokowi nian durante mandatu nuudár Prezidente Repúblika Indonézia.
Tuir Xanana, Jokowi nuudár líder ida neebé iha vizaun bá oin no fó atensaun bá dezenvolvimentu nasionál neebé ekitativu, inklui mós iha área sira fora hosi Illa Java, nunee la iha territóriu ida neebé hela iha kotuk.
“Jokowi nuudár líder ida neebé buka halo dezenvolvimentu bá iha territóriu hotu-hotu no la husik ema ida ka área ida iha kotuk. Buat neebé importante hosi Jokowi maka harii nasaun ida neebé forte no inkluzivu. Jokowi iha povu Timorense nia fuan. Agradese bá ita bo’ot nia kontribuisaun”, hatete PM Xanana liu husi nota komunikadu ofisial neebe STL asesu husi media GPM, Sabadu (05/09/2026).
Relasaun entre Xanana Gusmão ho Jokowi mós la limita deit bá relasaun entre eis no atuál líder. Enkontru iha Solo nee hatudu dimensaun umana hosi amizade neebé dezenvolve durante sira nia relasaun, iha tempu sira servisu nuudár líder nasaun rua nian.
PM Xanana mós hatoo agradesimentu bá Jokowi tanba konvida nia atu vizita no hasoru-malu iha Solo, liu-liu iha Jokowi nia rezidénsia.
Enkontru ida-nee, maski halao iha ambiente simples no informál, lori mensajen ida neebé boot: amizade entre ema no líder sira bele sai ponte ida hodi hametin relasaun entre nasaun rua.
(alb)
