DILI, STLTIMORLESTE.com – Francisco Dionísio Fernandes ne’ebé konhese ho naran “Maukura”, ofisialmente anunsia ninia intensaun atu tama ba prosesu pré-kandidatura ba Eleisaun Prezidensiál Timor-Leste ba períodu 2027–2032.
Maukura halo deklarasaun ne’e iha konferénsia imprensa ne’ebé realiza iha sede ninia movimentu kandidatura, iha Fatuhada, Díli, Sabadu (05/09/2026)
Nia hateten katak sistema demokrátiku Timor-Leste fó oportunidade ba sidadaun sira ne’ebé kumpre rekizitu konstitusionál atu aprezenta sira-nia intensaun ba kargu Prezidente Repúblika.
“Hau bolu ita-boot sira mai atu aprezenta ba públiku, tanba durante ne’e ita-boot sira akompaña ona hau nia intensaun atu kandidatu ba Prezidente Repúblika,” hateten Maukura ba jornalista sira.
Maukura afirma katak, durante luta ba ukun-rasik-an, nia dedika an atu kontribui ba nasaun. Maibé, hanesan joven rezisténsia ida, nia konsidera katak kontribuisaun ne’ebé nia halo to’o agora seidauk sufisiente. Tanba ne’e, nia foti desizaun atu konsidera kandidatura ba kargu Prezidente Repúblika.
Hafoin Konsulta Popular iha 1999, nia dehan kontinua dedika an liuhusi servisu públiku no kontribui ba prosesu tranzisaun Timor-Leste, hamutuk ho Timor-oan sira seluk, to’o iha períodu restaurasaun independénsia.
Nia mos subliña katak esperiénsia profisionál ne’ebé nia hetan durante nia servisu iha Ministériu Negósiu Estranjeiru no Kooperasaun (MNEK), no hanesan diplomata ne’ebé reprezenta Timor-Leste iha nasaun sira iha rejiaun ASEAN, sai baze ba nia intensaun atu kontinua kontribui ba nasaun liuhusi kargu Prezidente Repúblika.
“Ho hau nia koñesimentu kle’an kona-ba asuntu internasionál no diplomásia, no kompriensaun kona-ba Timor-Leste nia nesesidade, hau hakarak kontinua kontribui ba nasaun,” dehan nia.
Maukura hateten katak, iha momentu ne’e nia seidauk aprezenta programa prioridade detalhadu, tanba foin anunsia intensaun atu tama ba prosesu kandidatura.
Nia dehan, programa prioridade sira sei aprezenta ho detallu liután bainhira prosesu eleisaun tama ona ba períodu kampaña eleitorál, depois dekreta ona data ofisiál eleisaun prezidensiál.
Maski nune’e, nia hateten katak unidade nasional no koesaun nasional sei sai entre asuntu importante iha ninia intensaun polítika.
“Hau hanoin ita sei ko’alia programa detallu liu iha períodu kampaña eleitorál. Maibé, hau bele fó sai ona pontu prinsipál, hanesan kaer metin unidade nasional no promove koesaun nasional. Timor-Leste liu ona krize 2006 no impase polítiku, tanba ne’e ita presiza Prezidente ida ne’ebé bele promove diálogu entre líder nasional sira no líder partidu polítiku, hodi haree ba interese nasional,” afirma Maukura.
Perfil badak
Francisco Dionísio Fernandes “Maukura” moris iha Díli, iha 24 Juñu 1974. Nia iha esperiénsia iha área rezisténsia, servisu públiku no diplomásia.
Iha nia trajetória profisionál, Maukura ocupa pozisaun iha Ministériu Negósiu Estranjeiru no Kooperasaun, inklui iha área asuntu bilaterál. Nia mos servisu iha representasaun diplomátika Timor-Leste iha Genebra, Suíça, no iha Índia, inklui durante prosesu estabelesimentu Embaixada Timor-Leste iha Nova Délhi.
Iha área polítika, Maukura iha ona envolvimentu ho FRETILIN no Frente Mudança antes de fila fali ba FRETILIN.
Nia trajetória ne’e envolve esperiénsia iha rezisténsia, polítika no diplomásia, ne’ebé nia uza hanesan baze atu aprezenta ninia intensaun ba pré-kandidatura Eleisaun Prezidensiál 2027–2032.
(alb)
