BAUCAU, STLTIMORLESTE.com – Konsellu Konsultivu Munisípal (KKM) Baucau aprova sirkular urjente kontrola asu no prevensaun moras rabies iha Munisípiu Baucau, hafoin ekipa Task Force Baucau Zero ba Rabies (BAZERA) rejista 742 vítima, 41 asu pozitivu no mate na’in 5.
Aprovasaun ne’e akontese iha reuniaun KKM, loron 11 Setembru 2026, ho objetivu atu fó baze legal ba autoridade sira atu kontrola asu, liuliu asu ne’ebé husik lao livre iha estrada no fatin públiku Munisípal Baucau.
Tanba dadus husi Task Force Baucau Zero ba Rabies (BAZERA) hatudu katak, husi fulan Janeiru to’o Agostu 2026, rejista ona ema na’in 742 ne’ebé hetan tata husi asu. Husi kazu hirak ne’e, deteta asu pozitivu rabies hamutuk 41 no ema na’in lima mate tanba moras rabies.
Prezidente Autoridade Munisípal Baucau, Veneranda Lemos, hateten sirkular ne’e importante atu define medida ne’ebé komunidade no autoridade kompetente tenke foti ba asu ne’ebé hetan iha fatin públiku.
“Ita deskuti atu hasai sirkular ne’e atu serve hanesan termu legal ida ba ema sira ne’ebé iha asu no ba asu sira ne’ebé ita hetan iha fatin públiku, saida mak ita presiza halo,” hateten Veneranda Lemos iha Salaun Soimali, Vila Nova, Baucau, Sesta (11/09/2026).
Nia hateten katak, depois sirkular ne’e aprova no asina, dokumentu sei fahe ba Postu Administrativu no Suku sira hodi transmite ba komunidade sira molok ekipa konjunta implementa.
Tuir esbosu ne’ebé deskuti iha KKM, komunidade ne’ebé hakiak asu tenke kontrola no tau asu sira iha fatin seguru no apropriadu.
Asu labele sai livre ba estrada ka fatin públiku tanba bele fó prejuizu no ameasa seguransa ba ema seluk.
Asu ne’ebé lao livre iha estrada no fatin públiku, bainhira autoridade kompetente hetan, sei halo aprensaun no eliminasaun tuir medida ne’ebé determina iha sirkular.
“Hau hanoin medida preventivu sira ne’ebé ita preokupa ne’e akomoda ona iha artigu sira. Husi hau nia parte, asu ka busa sira ne’ebé lao iha estrada ne’e konsidera nain laiha, no ekipa konjunta bele elimina,” Veneranda Lemos hateten.
Nia esplika tan katak, bainhira ekipa konjunta tun terenu, hare’e asu la’o livre iha estrada no fatin públiku ekipa sei elemina, tanba asu iha nain, nain tenke asegura asu hela iha uma no labele husik sai livre ba fatin públiku.
“Ita elimina tenke halo ho maneira ida ho razoável, hodi labele provoka situasaun iha kraik. Ita halo uluk hanesan ne’e iha kraik, mak la di’ak, entaun ita presiza hadia, se ita la hahú susar,” nia dehan.
Aprovasaun sirkular medida urjente kontrola asu no prevensaun moras rabies ne’e liuhusi votasaun iha KKM Baucau, ho votus 64 afavor, kontra 0 no abstensaun 0.
Ho aprovasaun ne’e, autoridade munisípal sei fahe sirkular ba Postu Administrativu no suku sira atu sai referénsia iha implementasaun medida kontrola asu no prevensaun rabies iha komunidade.
(tom)
