AMBENO, STLTIMORLESTE.com — Komunidade Nitibe, Oecusse, hatudu kontentamentu ba Governu no Autoridade RAEOA tanba kontinua reabilitasaun estrada husi vila Oecusse ba área rurál, liuliu Postu Administrativu Nitibe.
Victor Quebo, komunidade Suku Beneufe, Postu Administrativu Nitibe, hato’o sentimentu ne’e iha Bairo Kuan Tua, Suku Usi Taku, Sabadu (12/09/2026).
“Ami nu’udar povu Oecusse, liuliu Postu Administrativu Nitibe, Suku Beneufe no Suku Usi Taku, sente kontente ba Governu no Autoridade RAEOA tanba kontinua obra reabilitasaun estrada husi vila Oecusse ba postu administrativu sira, liuliu Nitibe,” afirma Victor.
Nia esplika, iha faze primeiru, obra foka ba alargamentu estrada no ateiru. Agora tama ona ba faze segundu, ne’ebé kompañia tau agregadu no halo baleta kuak iha sorin estrada atu ajuda kontrola bee bainhira udan.
Victor husu kompañia konstrusaun atu hala’o servisu ho seriedade no aselera projetu ho kualidade, tanba osan estadu ne’ebé uza ba reabilitasaun estrada tenke fó benefísiu direta ba povu.
Nia dehan, estrada di’ak sei fasilita movimentu transporte públiku no privadu, inklui fasilita komunidade lori sira-nia produtu ba merkadu no sustenta nesesidade ekonomia família.
Komunidade Husu Estrada Ho Kualidade
Motorizta truk, Antonio Eko, ne’ebé hala’o transporte material konstrusaun iha área Nitibe, mós expresa kontentamentu tanba Autoridade RAEOA kontinua reabilitasaun estrada iha área rurál.
“Ami espera katak konstrusaun estrada ne’e bele finaliza lalais, atu nune’e tulun povu nia movimentu iha tempu udan no tempu bailoron,” dehan Antonio.
Komunidade seluk, Mariano Tefa Coa, dehan obra reabilitasaun estrada agora lao ba oin tanba kompañia sira kontinua hala’o servisu husi vila ba área rurál.
“Agora obra ne’e tama ba faze segundu, halo estrada kaber ho agregadu. Ami husu ba Governu atu tau atensaun ba estrada ne’e tanba aban bainrua bele sai parte husi ligasaun estrada internasionál Kupang–Indonézia, liuhusi vila Oecusse ba fronteira Naktuka,” afirma Mariano.
Nia dehan povu kontente tanba kondisaun estrada di’ak liu ona, maibé se la tau material apropriadu ba estrada, komunidade sei hasoru problema rai rahun, liuliu durante tempu bailoron.
Jestor: Faze Segundu Hahu Ona
Jestor Postu Administrativu Nitibe, Agustinho Afulit, dehan projetu reabilitasaun estrada husi Suku Suni Ufe ba Suku Usi Taku no Aldeia Bitila, Suku Beneufe, hahú ona tama ba faze segundu.
Nia hateten, kompañia Lifau Indah no Reinaldo hahú ona hala’o faze segundu, inklui tau agregadu no hadi’a estrutura estrada.
“Ami agradese ba IX Governu Konstitusionál, lideradu husi Primeiru-Ministru Kay Rala Xanana Gusmão, ne’ebé kontinua fó atensaun ba povu liuhusi reabilitasaun estrada iha Oecusse, ne’ebé dadaun tau matan husi Autoridade RAEOA,” dehan Agustinho.
Nia esplika, kompañia Lifau Indah hala’o obra husi Suku Suni Ufe to’o Aldeia Bona, Suku Usi Taku. Kompañia Reinaldo hala’o obra husi Mota Bona to’o Nuni, no kompañia Kolneno iha responsabilidade ba seksaun husi Nuni to’o Aldeia Manan.
Agustinho hateten, kompañia Kolneno seidauk hahú faze segundu iha seksaun Nuni to’o Aldeia Manan no Aldeia Bitila.
Tanba ne’e, nia husu kompañia sira atu kontinua no aselera reabilitasaun, inklui halo drenajen, dalan bee no ateiru iha faze segundu, atu estrada bele reziste no la fasil aat bainhira tempu udan.
(jos)
