DÍLI, STLTIMORLESTE.com — FC Villa Ave Maria konsege hakat ba partida finál Copa Instituto Superior Dom Bosco, depois de derrota FC Humbuti ho rezultadu 2–1, iha partida kuartu finál ne’ebé hala’o iha Campo Futebol Dom Bosco, Comoro, Dili, Sesta-feira, 11/09/2026.
Partida ne’e lidera husi árbitru Guarte, ho árbitru asistente primeiru Renato no asistente segundu Celino. Jogu hala’o durante minutu 80.
Iha inísiu primeira parte, seidauk to’o minutu ida, FC Humbuti konsege loke skor liuhusi nia jogador Helio, ho númeru kamizola 8. Golu ne’e halo FC Humbuti lidera uluk ho skor 1–0.
Maibé, FC Villa Ave Maria la demora atu responde. Iha minutu 11, jogador Forlan, ho númeru kamizola 24, aproveita oportunidade no konsege hatama bola ba baliza FC Humbuti, hodi empate rezultadu sai 1–1.
Depois de golu empate, jogadór husi ekipa rua kontinua halo ataka ba malu. Jogu lao ho intensa no movimentu ne’ebé diak, maibé durante primeira parte, FC Villa Ave Maria hatudu dominasaun liu iha kontrolu bola.
To’o árbitru apita remata primeira parte, rezultadu nafatin empate 1–1.
Depois de deskansu, ekipa rua fila fali ba kampu hodi kontinua disputa iha segunda parte. Iha parte ida-ne’e, FC Humbuti komesa domina jogu no halo ataka balun ba baliza FC Villa Ave Maria.
Maibé, tama ba minutu 20 segunda parte, FC Villa Ave Maria komesa muda ritmu jogu no buka kontrola fali bola. Esforsu ne’e fó rezultadu iha minutu 25, bainhira jogador Caro, ho númeru kamizola 11, konsege hatama golu ba baliza FC Humbuti.
Golu Caro halo FC Villa Ave Maria muda situasaun no lidera partida ho skor 2–1.
Iha minutu 38 segunda parte, jogador FC Villa Ave Maria, Ikun, ho númeru kamizola 10, hetan kartaun mean husi árbitru. Ho nune’e, FC Villa Ave Maria tenki kontinua partida ho jogadór na’in 10.
Maski joga ho jogadór na’in 10, FC Villa Ave Maria konsege mantein nia vantagem to’o tempu regulamentár remata.
Árbitru apita remata partida, no FC Villa Ave Maria sai hanesan vencedór ho skor 2–1, hodi asegura nia vaga ba partida finál Copa Instituto Superior Dom Bosco.
(leo)
