DILI, STLTIMORLESTE.com – Kuzineira merenda eskolar iha Ensinu Baziku Filial (EBF) Vila-Verde, Munisípiu Dili, kada loron prepara no tein merenda eskolar tuir menu ne’ebé estabelese iha manual programa merenda eskolar.
Haktuir Xefi Kuzineira Merenda Eskolar EBF Vila-Verde, Anina Caetano, ba STL Segunda nee (14/09/2026), estudante sira kada loron hetan merenda ne’ebé inklui aifuan lokal, hanesan hudi, sabraka no pateka.
“Ita nia estudante sira kada loron konsume aifuan hanesan hudi, sabraka no pateka. Ami nain tolu mak prepara no tein hahan ba estudante sira. Menu merenda eskolar ami lao tuir manual ne’ebé iha ona,” nia afirma.
Nia hatete katak, menu sira varia kada loron, inklui bifi ho modo tahan no aifuan, kizadu modo tahan ho bee no aifuan, no etu ho manu-tolun.
Tuir Anina Caetano, kuzineira sira prepara hahan ho ai-sunu no tenke hahú servisu sedu, tanba estudante sira iha turnu dader no sira tenke simu merenda iha tuku 10 liu minutu 30.
“Ami tein bazeia ba menu ne’ebé iha ona. Estudante sira kada loron asesu ba merenda tuir oras ne’ebé bai-bain sira han. Dader ami tenke mai sedu iha eskola atu prepara hahan, tanba estudante sira tenke han iha tuku 10 liu,” nia informa.
Nune’e mós, Kordenadora EBF Vila-Verde, Josefina Maia, hatete katak implementasaun programa merenda eskolar to’o agora lao diak no tuir atividade normal.
Nia dehan, kada loron kuzineira sira prepara hahan tuir menu ne’ebé estabelese ona iha manual, atu garante estudante sira hetan merenda eskolar ho menu ne’ebé apropriadu.
Enkuantu, estudante Antonio de Jesus dehan, iha momentu entrevista nia seidauk han merenda tanba oras han seidauk to’o. Maibé, nia sente kontente tanba kada loron estudante sira asesu ba merenda eskolar, inklui aifuan ne’ebé prepara ona.
“Agora ami seidauk han tanba oras seidauk to’o. Bai-bain ami han iha tuku 10 liu. Hau sente kontente tanba kada loron ami asesu ba merenda eskolar, no ami han mós aifuan ne’ebé prepara ona,” nia informa.
(jac)
