DILI, STLTIMORLESTE.com – Programa Sunrise Joint Venture: Health Outreach & Preventive Empowerment (SJV HOPE) oferese servisu saúde integradu no gratuitu ba komunidade remotas, hodi supera barreira geográfika no asesu limitadu.
Programa SJV HOPE ofisialmente lansa iha Suku Uma Berloik, Postu Administrativu Alas, Munisípiu Manufahi, iha 8 Setembru 2026.
Programa ne’e oferese servisu saúde móvel integradu ho kualidade no gratuitu ba komunidade iha área remota no izoladu, ne’ebé enfrenta difikuldade asesu tanba distánsia, kondisaun estrada no mota boot, liuliu iha tempu udan.
Inisiativa ne’e hetan apoiu finanseiru husi Sunrise Joint Venture (SJV), ne’ebé kompostu husi Woodside Energy, TimorGAP no Osaka Gas, no hala’o servisu hamutuk ho Governu Timor-Leste liuhusi Sentru Saúde Komunitáriu (SSK) Alas no SSK Same.
Ordem Malta Clinic (SMOM Medical) sai nu’udar parseiru prinsipál ne’ebé fornese ekipa médiku, konsultasaun jerál, imunizasaun no referál ba pasiente sira ne’ebé presiza tratamentu liután.
Gestor Programa Saúde Inan no Oan Fundasaun Alola, José Ximenes, hatete Fundasaun Alola kaer papél estratéjiku iha mobilizasaun komunidade, liuliu iha nivel aldeia no suku.
Nia hatete, atividade Fundasaun Alola inklui kampaña saúde inan no oan, nutrisaun, edukasaun komunidade no mobilizasaun, hodi fasilita komunidade asesu ba ekipa saúde móvel.
“Ita-nia objetivu atu redús taxa morbidade no mortalidade inan no oan, no atrai inan sira atu partu iha fasilidade saúde. Balu la bele ba fasilidade saúde tanba laiha kbiit ka roupa,” dehan José liu husi komunikadu imprensa neebe diariu nee asesu husi media Fundasaun Alola, Segunda (14/09/2026).
Tuir nia, Fundasaun Alola mós fó kapasitasaun ba grupu voluntáriu SHIO (Suku Hadomi Inan no Oan), ne’ebé estabelese husi 2014 iha Ainaro no Aileu no agora kontinua atividade iha Manufahi.
Membru SHIO sira hetan treinu kona-ba ai-han komplementár, konseling no vizita uma-kain, hodi encoraja inan sira atu asesu ba fasilidade saúde.
José hatete, membru SHIO importante atu ajuda liga komunidade ho servisu saúde, liuliu iha área ne’ebé enfrenta limitasaun rekursu umanu.
Reprezentante SSK Alas, Joel Fernandes, hatete programa ne’e ajuda SSK supera dezafiu jeográfiku ne’ebé komunidade sira enfrenta, liuliu iha tempu udan.
Nia hatete, ekipa saúde bele halo rastreiu ba labarik sira ne’ebé sofre malnutrisaun no identifika kazu grave ne’ebé presiza tratamentu.
“SSK Alas agradese tebes ba apoiu ekipamentu, medikamentu no membru sira ne’ebé fó apoiu. Fatin hanesan Sarin, Manus, Nailebok no Aituha, ita hein bailoron foin bele tama. Se udan, bee halai iha mota laran no ita la bele tama,” dehan Joel.
Reprezentante Woodside Energy, Isodoro Correia, hatete partisipasaun husi parte hotu importante atu programa ne’e bele hamosu impaktu pozitivu ba komunidade.
“Ita hakarak hetan mudansa ho impaktu, maibé mudansa ne’e bele mosu bainhira hotu-hotu partisipa ho di’ak. Ita fiar katak inan sira hakarak oan sira saúde di’ak, no mane sira mós hakarak feen sira saúde di’ak,” dehan Isodoro.
Programa SJV HOPE sai hanesan parseria multisetoriál ne’ebé envolve setor privadu, organizasaun sosiál no Governu, hodi hakbesik servisu saúde ba komunidade remota no izoladu iha Manufahi.
(dom)
