DILI, STLTIMORLESTE.com – Komandante Polísia Nasional Timor-Leste (PNTL) Munisípiu Dili, Komisáriu Asistente Polísia Orlando Gomes afirma katak, Konsellu Polisiamentu Komunitária (KPK) nia knaar prinsipál mak apoia polísia prevene krime, la’ós halo kapturasaun.
Nia dehan katak, membru KPK sira iha responsabilidade atu fó informasaun, halo patrullamentu no ronda hamutuk ho Polísia Ofisiál Suku (OPS).
“Servisu kapturasaun no prosesu kriminál mak kompeténsia polísia nian. KPK sira fó apoiu liuhusi patrullamentu, ronda no informasaun,” hatete Komandante PNTL Munisípiu Dili, Komisáriu Asistente Polísia Orlando Gomes ba jornalista sira iha Eskadra Dom Aleixo, Kuarta-feira (04/11/2026).
Nia hateten katak, antes membru KPK balun hala’o knaar la tuir prosedimentu, maibé agora sira simu ona formasaun kona-ba funsaun no limitasaun iha servisu.
Tuir nia, membru KPK sira labele halo kapturasaun ka asaun seluk ne’ebé kompeténsia eskluziva polísia nian.
Orlando mós afirma katak, membru KPK sira iha limite oras servisu, liuliu durante kalan, ne’ebé labele liu tuku 23:00.
“Depois tuku 23:00, sira tenke fila ba uma atu deskansa. Polísia mak kontinua hala’o servisu seguransa,” nia esplika.
Nia subliña katak, KPK sira tenke hala’o atividade tuir orientasaun komandu no OPS sira, atu evita asaun ne’ebé bele halo komunidade la satisfás.
Komandante PNTL Dili ne’e mós fó avizu katak membru KPK labele forma grupu boot no intimida komunidade, ka halo kapturasaun sein autoridade.
Nia husu membru KPK sira atu servisu hamutuk ho OPS no autoridade suku, hodi garante katak atividade hotu-hotu tuir regulamentu.
Orlando hateten katak, KPK sira sei mobiliza liu-liu durante eventu importante, hanesan Finadu, Natal, Tinan-Foun, loron nasionál no atividade boot sira.
Nia mós informa katak, PNTL Munisípiu Dili hala’o ona tomada de pose ba membru KPK iha suku sira iha kapitál, atu hametin koordenasaun entre polísia no komunidade.
Aleinde patrullamentu, KPK sira mós sei apoia atividade prevensaun krime liuhusi sosializasaun iha eskola sira, inklui edukasaun kona-ba sidada nia responsabilidade no prevensaun konflitu.
Komandante PNTL Dili afirma katak, KPK mak reprezenta komunidade iha servisu hamutuk ho polísia, atu hametin seguransa no prevene krime iha nivel suku.
(jen)
