BAUCAU, STLTIMORLESTE.com – Eletrisidade Timor-Leste, Empreza Públika (EDTL,EP) Munisípal Baucau alerta ba komunidade kliente sira atu uza fiu eletrisidade kualidade tuir padraun iha instalasaun eletrisidade iha uma hela-fatin, tanba instalasaun fiu ne’ebé la apropriadu bele hamosu sirkuitu no aumenta risku insendiu.
Alerta ne’e bazeia ba informasaun husi Autoridade Protesaun Sivíl Munisípal Baucau, ne’ebé kontinua rejista kazu insendiu iha uma komunidade sira, ne’ebé, maioria afeta ba insendiu, kauza husi sirkuitu instalasaun eletrisidade iha uma laran.
Xefe Unidade EDTL,EP Munisipál Baucau, Edegar B. da Silva hateten, informasaun husi Autoridade Protesaun Sivíl kona-ba insendiu sira ne’ebé afeta ba uma komunidade sira iha Munisípiu Baucau, kauza husi sirkuitu instalasaun fiu eletrisidade, ne’e la’os kauza husi fiu EDTL nian ne’ebé kanaliza husi rin ba uma komunidade sira nian, maibé dala ruma komunidade sira mak utiliza sala enerjia eletrisidade.
“Insendiu ne’e kada vez sala mós husi uma-na’in sira liga fiu sira, husik hela sasan hanesan nono bee ruma, haluhan ba fali toos no natar, la halo mate, ida-ne’e mós fó impaktu hotu,” hateten Edegar ba STL iha Vila Nova Baucau, Segunda (14/09/2026).
Nia esplika, responsabilidade EDTL ba instalasaun fiu eletrisidade iha uma komunidade nian limita ba liña baixa monofásika husi rin eletrisidade to’o iha prepagamentu iha uma komunidade.
Enkuantu instalasaun eletrisidade iha uma laran inklui fiu, tomada, interruptor no ligasaun sira seluk, responsabilidade tomak iha uma-na’in ka kliente nian.
Tanba ne’e, Edegar husu komunidade atu la halo instalasaun eletrisidade ho fiu ne’ebé la iha kualidade, tanba fiu la apropriadu bele manas liu, hamosu short circuit no ikusmai bele hamosu ahi.
Nia mós rekoñese katak, iha komunidade balu, uza fiu ne’ebé la tuir kualidade tanba kondisaun ekonomia.
“Se hakarak fiu di’ak tuir ida-idak nia ekonomia, ami labele interven iha laran. Maibé, se hakarak seguru, labele iha buat sira; tenke uza fiu tuir padraun. Labele uza fali fiu hanesan tali charger telefone nian atu liga iha uma laran. Tenke sosa fiu ho kualidade, maibé tuir ida-idak nia osan,” rekomenda Edegar.
Iha sorin seluk, Komandante Operasaun Autoridade Protesaun Sivíl Munisípal Baucau, Francisco Viana Freitas, hateten katak dadus kazu dezastre ne’ebé rejista husi instituisaun ne’e, liuliu insendiu, hatudu katak problema sirkuitu instalasaun eletrisidade iha uma laran sai kauza ne’ebé dala barak akontese.
Nia husu komunidade atu aumenta kuidadu ba instalasaun eletrisidade, liuliu bainhira sai husi uma ba fatin seluk.
“Iha uma, kuandu ita la asegura eletrisidade bele afeta. Entaun ami fahe informasaun, kuandu sai husi uma karik tenke kontrola eletrisidade. Di’ak liu hamate tiha prepagamentu, tanba iha Baucau ita haree sirkuitu fiu eletrisidade mak barak liu,” hateten Francisco.
Autoridade sira ne’e kontinua husu uma-na’in sira atu la karga tomada, la uza fiu ne’ebé aat ka la iha padraun, no asegura aparellu eletrisidade sira desligadu bainhira la uza, hodi hamenus risku insendiu iha uma hela-fatin.
(tom)
