DILI, STLTIMORLESTE.com – Konstrusaun edifísiu foun Komandu Polísia Nasionál Timor-Leste (PNTL) Munisípiu Dili sei uza orsamentu US$ 500 mil.
Segundu Komandante PNTL Munisípiu Dili, Superintendente Xefe Luís da Silva hatete, orsamentu aumenta hosi US$ 300 mil ba US$ 500 mil.
“Orsamentu uluk US$ 300 mil, maibé tékniku haree rai iha bee. Tanba ne’e, aumenta ba US$ 500 mil.”
Luís da Silva hatete, konstrusaun sei kontinua, tanba edifísiu atual iha kondisaun grave no la apropriadu ba servisu.
Nia esplika, plafon komesa tun, uma dodok no bee sae bainhira udan. Tanba ne’e, Komandante Distritu servisu temporariamente iha Eskuadra Don Aleixo.
Maski nune’e, Segundu Komandante ho membru PNTL sira kontinua hala’o servisu iha Munisípiu Dili.
Nia husu Governu no Komandu Jerál PNTL atu fó atensaun ba infraestrutura, hodi dignifika instituisaun no garante kondisaun servisu di’ak.
Ba konstrusaun Eskuadra Feto Vera Cruz, nia informa katak prosesu sei interliga ho ministériu relevante. Tenderizasaun seidauk hahú.
Nunuee mos Komandante Jerál PNTL, Komisáriu Asistente Polísia Afonso de Jesus dos Santos hatete, konstrusaun edifísiu PNTL sai prioridade.
“Ha’u ko’alia ona ho Ministru Obras Públika. Tempu badak sira sei haree fatin foun ba Komandu Munisípiu Dili.”
Afonso hatete, Dili sai prioridade númeru ida ba konstrusaun edifísiu PNTL, tanba Dili mak kapitál nasaun nian.
Edifísiu atual enfrenta problema prinsipál, inklui uma dodok, plafon tun no bee sae durante tempu udan.
(jen)
