DILI, STLTIMORLESTE.com – Komunidade uma kain lima (5) iha Aldeia Lakenu, Suku Manelima, Postu Laclubar, Munisipiu Manatutu, to’o oras ne seidauk asesu ba liña eletrisidade.
Preokupasaun nee hato’o husi Xefe Aldeia Lakenu, Flaviano Soares ba STL liu husi telefone iha Manatuto, Segunda (14/09/2026).
Tuir Flaviano, husi total uma kain 44 iha Aldeia Lakenu, uma kain 39 asesu ona eletrisidade, maibe uma kain 5 seidauk tanba hela dook husi suku no hamutuk ho Aldeia Amanun.
“Hau nia Aldeia Lakenu nee Uma kain lima seidauk asesu ahi eletrisidade,” nia dehan.
Nia lamenta katak, hahu husi tinan 1999 too agora, maske autoridade troka malu ona, maibé area rurais kontinua halerik ba ahi.
Nu’udar ain liman, nia dehan nia submete ona preokupasaun ba Xefe Suku no Administrador Postu, maibé too agora seidauk hetan resposta.
“Hau sente triste tanba ita ukun aan tinan 24, iha balun asesu ona ba ahi no iha balun ne’ebé kontinua iha nakukun,” nia hatete.
Komunidade nia susar iha kalan mak sira sunu lilin hodi hetan naroman no maluk balun iha kalan uza gerador hodi loke naroman.
Flaviano husu ba ministeriu relevante atu bele tau matan lalais ba komunidade ne’ebé kontinua halerik ba asesu eletrisidade.
Nune’e mos omunidade Sejuina Soares hatete, nia sente triste, tanba tinan ba tinan hela de’it iha kondisaun ne’e.
“Labele hadia iha sidade deit, maibe tau matan mós area remotas nee, ami nu’udar povu kiik labele halo buat ida, husu nai ulun sira tau matan,” nia dehan.
(joa)
