DÍLI, STLTIMORLESTE.com — Kadete 12.877 pasa reverifikasaun dokumentu no sei kontinua ba faze tuir mai iha rekrutamentu Polisia Nasional Timor Leste (PNTL) 2026.
Komisáriu Asistente Polísia José Soares, nu’udar Prezidente Júri Reteste Rekrutamentu PNTL 2026 hatete, prosesu reverifikasaun dokumentu konklui ona.
Nia hatete, Sekretariadu submete ona rezultadu ba Komandante Jerál PNTL no Ministériu Interior. Rezultadu sei publika iha Jornal da Repúblika.
“Sekretariadu konklui ona reverifikasaun. Ita sei entrega rezultadu kadete 12.877 no sei publika iha Jornal da Repúblika,” hatete José Soares.
Nia esplika, prosesu hala’o tuir Diploma Ministeriál Nú. 35/2026, ho prinsipiu méritu, transparénsia no akontabilidade.
“Durante ami halo servisu, laiha individuál ne’ebé halo intervensaun. Ami servisu tuir lei no independente,” nia informa.
José Soares husu kandidatu sira ne’ebé pasa atu prepara-an ba prova kulturál. Naran kandidatu sira sei hatama iha munisípiu hotu.
“Ita husu kandidatu sira bele halo reklamasaun durante loron lima, hahú husi data publikasaun,” nia deklara.
(jen)
