BAUCAU, STLTIMORLESTE.com – Peregrina na’in haat (4) no peregrinu na’in haat (4) inklui labarik mane idade 7, hetan tuda husi ema deskoñesidu bainhira sira hala’o peregrinasaun ba Foho Matebian, Munisípiu Baucau.
Peregrina Remigia Guterres Brito esplika katak iha loron 12 Setembru 2026, nia ho família no kolega hamutuk na’in ualu, inklui labarik mane idade 7, husi Postu Administrativu Baucau Vila hala’o peregrinasaun ba Foho Matebian.
Hafoin sira to’o iha área Foho Matebian, besik oras tuku 00:00 kalan no kontinua kedas monta tenda hamutuk unidade lima atu uza nu’udar fatin deskansa.
Remigia hateten katak hafoin remata monta tenda no prepara hahan ne’ebé sira lori han hodi kontinua ba deskansa. Maibé, derepente ema habosok no tuda fatuk ba fatin ne’ebé sira deskansa.
“Parte kemping ami feto nian, hau haree ema ida hamrik iha sudut kemping ha’u toba ba ne’e. Maibé kolega sira seluk dehan sira haree ema la’o ba mai, maibé lahatene ema hira,” Remigia konta ba STL liuhusi telefone, Tersa (15/09/2026).
Nia hateten katak tanba sira fahe malu iha tenda lima, iha momentu uluk sira suspeita katak movimentu ne’ebé sira haree bele de’it movimentu ema ne’ebé mai iha área ne’e.
“Tanba ami toba keta-ketak iha kamping lima, ami hanoin rai-na’in ka mate-klamar mak lao ba mai. Entaun ami mos ignora, la fó atensaun ba ema nia la’o tanba tauk,” nia dehan.
Maibé, depois liu minutu 30, movimentu iha área ne’ebé sira deskansa sai maka’as liután. Ema deskoñesidu sira hahú tuda fatuk ba tenda rua, ne’ebé ida pertense ba labarik mane idade 7 ho nia inan, inklui tenda ida seluk.
Situasaun ne’e halo peregrina no peregrinu sira sai husi tenda no halai atu salva an. Iha momentu ne’e, fatuk boot ida kona peregrinu mane ida nia koskoleta no kona mós parte kotuk laran, maibé la rezulta kanek.
Enkuantu peregrina sira, inklui labarik mane idade 7, la hetan kona husi fatuk.
“Ami halai uluk tanba fatuk monu iha ami nia sorin, maibé la kona ami feto sira. Ami fiar katak fatuk ne’ebé tuda mai la’ós ema ida de’it mak tuda,” Remigia haktuir.
Nia mos esplika katak bainhira sira haree kolega mane ida hetan kona husi fatuk boot no nia dada iis ho difikuldade, sira la iha tempu atu buka haree oin ema ne’ebé tuda ka ema hira mak envolve.
“Ami atrapalla mos ho kolega mane ne’ebé hetan kona husi fatuk boot, tanba nia dada iis araska. Entaun ami la preokupa atu haree ema ne’e nia oin no ema na’in hira, maibé ami bolu malu tenke halai tun ba kraik hodi salva an,” nia dehan.
Hafoin grupu ne’e halai sai husi área kemping, Remigia hateten katak hahan no sasán sira ne’ebé sira rai hela iha tenda, ema deskoñesidu sira foti.
Maski insidente ne’e akontese, maibé Remigia hateten katak sira seidauk hato’o keixa ka relata ofisial ba autoridade kompetente iha Postu Administrativu Quelicai, tanba la koñese autór ba asaun ne’e.
(tom)
