DILI, STLTIMORLESTE.com — TimorGAP no Eastern Pacific Industrial Corporation Berhad (EPIC-Berhad), husi Malázia, asina Memorandu Entendimentu (MoU) atu hametin kooperasaun téknika ba dezenvolvimentu no operasaun Supply Base iha Suai.
Asinatura MoU ne’e realiza iha Dili, Kinta (24/09/2026) iha Timor Plaza Dili, ho objetivu atu aproveita esperiénsia EPIC iha jestaun no operasaun Kemaman Supply Base, iha Estadu Terengganu, Malázia, ba preparasaun futuru Supply Base Suai.
Prezidente no CEO TimorGAP, Rui Soares, hateten katak EPIC sei fó apoiu liuhusi konsultoria jestaun projetu no asesoria téknika, liuliu iha prosesu dezenhu, preparasaun, jestaun no operasaun Supply Base.
“Agora ami asina ona MoU ida-ne’e hodi prepara apoiu tékniku ba TimorGAP. Kooperasaun ne’e sei konsentra liuliu ba prosesu dezenhu, preparasaun, jestaun no operasaun Supply Base iha futuru,” dehan Rui Soares.
Nia hateten, EPIC iha esperiénsia naruk iha operasaun baze apoiu lojístika iha Malázia, liuliu Kemaman Supply Base, ne’ebé opera durante tinan barak.
Rui Soares konsidera esperiénsia EPIC nu’udar oportunidade atu partilla koñesimentu no kapasidade téknika ba dezenvolvimentu Supply Base Suai.
“EPIC husi Malázia, nasaun amiga iha ASEAN, iha esperiénsia barak ne’ebé bele partilla ho Timor-Leste, atu ajuda dezenvolvimentu Supply Base Suai lao diak no fó benefísiu ba parte hotu,” nia hateten.
Enkuantu ne’e, Group Chief Executive Officer (Group CEO) EPIC, Dr. TS. HJ. Muhtar Bin Suhali, hateten katak kompanhia ne’e iha esperiénsia iha operasaun Kemaman Supply Base, ne’ebé estabelese ona durante tinan 45.
“Intensaun husi MoU ne’e mak EPIC atu fó konsultoria jestaun projetu no asesoria téknika, liuliu ba operasaun no jestaun Supply Base,” dehan Muhtar.
Antes asinatura MoU, Ministru Petróleu no Rekursu Minerál Timor-Leste vizita Kemaman Supply Base iha fulan Maiu, atu haree oportunidade kooperasaun entre EPIC no TimorGAP.
Ekipa EPIC mós halo ona vizita ba área projetu Supply Base iha Suai, atu haree diretamente situasaun no oportunidade iha terenu.
Tuir Muhtar, kooperasaun sei kontinua liuhusi diskusaun téknika no komersiál entre ekipa konjunta ne’ebé sei forma husi TimorGAP no EPIC.
Diskusaun sira sei inklui aspetu tékniku no komersiál, ho objetivu atu hametin preparasaun ba dezenvolvimentu no operasaun Supply Base iha Timor-Leste.
Nia mós hateten katak, iha futuru, parte rua sei haree possibilidade ba oportunidade investimentu iha faze operasaun Supply Base, tuir rezultadu diskusaun no dezenvolvimentu projetu.
Asinatura MoU ne’e sai nu’udar etapa inisiál ba kooperasaun entre TimorGAP no EPIC, ho objetivu atu aproveita esperiénsia no koñesimentu EPIC iha jestaun Supply Base ba apoiu dezenvolvimentu setór petróleu no gás iha Timor-Leste.
(jos)
