DILI, STLTIMORLESTE.com – Ministériu Edukasaun (ME) liu husi Servisu Edukasaun Munisipiu Bobonaro, hapara ona kontratu ho Mokatil, ne’ebé fornese produtu ba Programa Merenda Eskolar (PME) iha eskola sira.
Kestaun ne’e hato’o husi Xefi Departamentu Programa Merenda Eskolar iha ME, Belchior Maria Almeida Barros, ba STL iha nia knar fatin, Sesta (25/09/2026).
Belchior hateten, ME foti desizaun atu hapara kontratu ho Mokatil tanba produtu ne’ebé fornese ba Programa Merenda Eskolar konsidera la diak no iha evidénsia kona-ba kondisaun produtu ne’e.
“Razaun Ministériu hapara kontratu ho Mokatil, tanba sira fornese produtu ba Programa Merenda Eskolar ne’ebé la diak ba ita-nia eskola sira. Ita boot sira hatudu evidénsia iha foto ne’e, tanba ne’e ami hapara ona kontratu ho sira. Kontratu remata iha loron 30 fulan ne’e,” dehan Belchior.
Nia hateten, hahú husi loron 30 fulan ne’e, ME sei la kontinua kontratu ho Mokatil atu fornese produtu merenda eskolar ba eskola sira iha Munisípiu Bobonaro.
Belchior mós hateten katak, implementasaun Programa Merenda Eskolar iha munisípiu sira seluk kontinua lao hanesan baibain. Maibé, iha Munisípiu Maliana no Lautem, fornecedór Mokatil sei iha responsabilidade ba fornese produtu.
“Maliana ho Lautem, Mokatil kaer ne’e mak sai problema hela. Tanba ne’e, implementasaun programa merenda iha munisípiu seluk lao diak hanesan baibain. Mokatil antes iha Same, ami haruka para, no iha Viqueque mós,” hateten nia.
Nia esplika katak, depois ME hapara kontratu ho Mokatil iha Bobonaro, agora Mokatil sei kontinua fornese ba munisípiu rua ne’ebé sei iha kontratu, enkuantu situasaun iha Bobonaro sei muda ba fornese ho mekanizmu seluk.
(jac)
