ERMERA, STLTIMORLESTE.com — Selebrasaun Loron Nasionál Funsaun Públika ba dala-13 realiza ho missa iha Paróquia Nossa Senhora da Graça, Gleno, Ermera, ne’ebé prezide husi Amo selebrante Recardino Mendonça Castro.
Missa ne’e realiza iha sexta-feira (25/09/2026). Iha homilia, Amo Recardino hateten katak, knaar prinsipál funsionáriu públiku mak servi nasaun no povu.
Amo dehan iha Homilia, loron ida ne’e fó nafatin atensaun ba ita ida-idak kona-ba oinsá atu hala’o ita-nia knaar, servi nasaun, servi povu, hanesan makina Estadu nian.
“Amo dehan asume knaar hanesan makina Estadu nian mak priviléjiu, maibé mós responsabilidade. Tanba ne’e, funsionáriu tenke hala’o servisu ho profisionál no responsabilidade, atu povu bele kontente ho servisu públiku no nasaun bele kontinua dezenvolve,” dehan Nia.
Amo dehan, ema hotu iha mehi no hakarak haree nasaun diak liután. Tanba ne’e, tinan ba tinan, funsionáriu públiku presiza aumenta kapasidade, hadi’a an no kontinua servi nasaun no povu ho diak liután.
Amo selebrante katak, liafuan Maromak konvida ema atu reflete kona-ba servisu ne’ebé hala’o. Liuhusi leitura primeira husi Livru Ekleziástiku, ema konvida atu komprende katak buat hotu iha nia tempu, oras no espasu, no servisu ema nian mós iha limitasaun tanba ema la moris ba nafatin.
Dehan tempu ne’ebé ema pasa sai hanesan sasukat ida atu hakerek nia istória. Maski loron ida ema sei lakon, buat diak ne’ebé ema halo bele hela nafatin hanesan parte husi nia istória.
Amo realsa katak, Maromak konvida no enkoraja ema atu uza sira-nia moris no kapasidade hanesan instrumentu atu servi. Ema bele sala iha dalan, maibé tenke aprende husi sala no hamriik fali, hanesan São Pedro ne’ebé kontinua tuir Jesus no moris tuir liafuan Maromak.
Nune husu Maromak nia tulun atu funsionáriu ida-idak bele hala’o didi’ak nia knaar no hakerek nia istória ho matenek, atu bele servi nasaun, Igreja no povu Timor-Leste.
Missa ne’e partisipa husi Provedór Direitus Umanus no Justisa (PDHJ), inklui funsionáriu públiku sira.
Hafoin missa remata, atividade kontinua ho kari ai-funan iha Jardim Erois Fatukeru.
(ter)
