BAUCAU, STLTIMORLESTE.com – Ministériu Dezenvolvimentu Rural no Habitasaun Komunitária (MDRHK), liuhusi Diresaun Revitalizasaun Komunitária, hahú ona programa apoiu manu broiler oan ba Sentru Dezenvolvimentu Aldeia (CDA) sira iha Munisípiu Baucau.
Fasilitadora Revitalizasaun Komunitária Munisípiu Baucau, Gorita Auxiliadora Correia Monis aprezenta, programa apoiu ba CDA sira hahú ona liuhusi entrega manu broiler oan iha Postu Administrativu Baucau Vila kobre ba CDA sia, no sei kontinua ba Postu Administrativu Venilale, Vemasse, Quelicai no Laga.
“Foin entrega ba CDA Lialailesu hamutuk 500 bikus manu ne’ebé Ministériu entrega ona ba sira atu grupu bele tau matan,” hateten Gorita ba jornalista sira hafoin entrega simbolikamente manu broiler oan ba CDA Lialailesu, iha Suku Tirilolo, Baucau Vila, sexta-feira (25/09/2026).
Gorita esplika katak, molok entrega manu broiler oan, Diresaun Revitalizasaun Komunitária fasilita ona formasaun ba CDA sira kona-ba maneira fó han, vasinasaun, kuidadu no tratamentu ba manu.
Tuir nia, manu broiler oan ne’ebé entrega ba kada CDA sei hakiak durante loron 28 to’o 35, antes tama ba faze koilleta.
Bainhira tama ona ba faze koilleta, CDA sira sei fa’an diretamente ba kompaña Funan Santa, tuir kontratu ne’ebé parte rua selebra ona.
“Objetivu ajuda husi Ministériu nian atu ajuda grupu sira hadia di’ak liután sira nia ekonomia família no hamenus mós malnutrisaun ne’ebé akontese dadaun iha ita-nia nasaun,” Gorita hateten
Nia husu CDA sira atu kuida no jere ho responsabilidade rekursu ne’ebé Ministériu entrega ona, atu programa ne’e bele fó benefísiu ba membru grupu sira no ba komunidade.
Iha fatin hanesan, koordenadór CDA Lialailesu, João Clau Belo, hamutuk ho membru na’in 11, hato’o agradesimentu ba Governu Timor-Leste tanba inisia programa ne’e hodi ajuda komunidade aumenta rendimentu ekonomia família liuhusi atividade hakiak manu broiler.
“Ha’u sei jere ha’u nia grupu ne’e la’o ho di’ak ba oin. Iha kompanhia ne’ebé ami servisu hamutuk tuir ona formasaun, no ha’u sei esplika fali ba grupu kona-ba maneira hakiak manu ho kuidadu di’ak atu bele koilleta,” João hateten
Enkuantu Xefe Aldeia Lialailesu, Damião da Silva, mós hato’o agradesimentu ba Governu Timor-Leste, liuhusi MDRHK, tanba fó apoiu ba komunidade, liuliu jovem sira iha aldeia ne’e, liuhusi atividade hakiak manu.
Nia konsidera programa ne’e bele sai oportunidade ba jovem sira atu dezenvolve atividade produtiva, aumenta rendimentu família no ajuda hamenus problema sosial iha komunidade.
“Nuudar autoridade, ami sempre apoiu jovem sira ne’ebé hakarak kria grupu. Ami husu ba Governu atu kontinua fó apoiu ba ita-nia jovem sira seluk ne’ebé seidauk hetan oportunidade,” Damião hateten
Entertantu CDA hakiak manu Broiler oan ne’ebé Ministériu Dezenvolvimentu Rural no Habitasaun Komunitária (MDRHK), liuhusi Diresaun Revitalizasaun Komunitária apoiu iha Munisípiu Baucau hamutuk 10 resin.
(tom)
