MATEBIAN, STLTIMORLESTE.com — Autoridade Suku Maluru, Postu Administrativu Matebian, Munisípiu Baucau, loke estrada foun ho distansia 750 metru atu fasilita asesu transporte no movimentasaun ba komunidade uma-kain 200 resin iha Suku Maluru no área fronteira ho Suku Lelalai.
Xefe Suku Maluru, Nuno Florindo, hateten katak iha tinan 2026, Autoridade Suku Maluru hetan alokasaun orsamentu hamutuk US$32,000 liuhusi Programa Nasionál Dezenvolvimentu Suku (PNDS). Liuhusi Konsellu Suku, foti desizaun atu uza orsamentu ne’e ba abertura estrada foun iha Aldeia Uaroro.
“Antes ne’e estrada laiha, maibé proposta husi Aldeia Uaroro, Suku Maluru, entaun ita haree katak ida ne’e importante. Nune’e, iha 2026 ita implementa ona iha ne’e,” hateten Nuno Florindo ba STL iha Uaroro, Maluru, Segunda (28/09/2026).
Nia esplika katak estrada ne’e konsidera hanesan infraestrutura Multi-Suku no Multi-Aldeia, tanba nia asesu la’ós de’it ba komunidade Uaroro, maibé mós komunidade husi Suku viziñu Lelalai, liuliu Aldeia Macaloso no Laisorolai de Baixo no Laisorolai de Cima, ho totál uma-kain 200 resin.
Tuir Nuno, projetu ne’e inklui abertura estrada, konstrusaun valeta ho naruk 400 metru no box culvert rua. Parte husi servisu hirak ne’e remata ona, maibé konstrusaun valeta no cór sei kontinua iha parte sira ne’ebé presiza.
“Objetivu mak atu komunidade sira bele asesu ho transporte, motor no kareta bele liu ho di’ak, liuliu iha tempu udan. Ho estrada ne’e, komunidade bele lori sai sira-nia produtu lokal ba merkadu,” Nuno hateten.
Komunidade Husu Estrada Permanente
Veteranu Marciano da Cruz, ne’ebé komunidade bolu “Boulesa”, hateten katak durante tinan barak komunidade Uaroro enfrenta difikuldade tanba laiha estrada ne’ebé fasilita transporte ba produtu lokal no nesesidade komunidade nian.
Nia konsidera abertura estrada foun ne’e hanesan mudansa importante ba komunidade, maski infraestrutura bázika seluk sei presiza atensaun.
“Foufoun ami tun husi ailaran mai, ita haree komunidade sira ne’e halerik tebes ba estrada, bee moos no eletrisidade. Maibé agora estrada iha ona,” hateten Boulesa.
Nia mós husu Governu, liuhusi Ministériu Obras Públikas, atu tau atensaun ba kondisaun estrada iha Postu Administrativu Matebian.
Tuir nia, estrada balu iha área Matebian komesa loke ona ho fazeadu, maibé kondisaun ne’e seidauk permanente tanba maioria sei provizóriu.
“Agora estrada sira komesa loke ona, maibé sei provizóriu de’it. Tanba ne’e, ami husu Ministériu Obras Públikas atu tau atensaun iha planu no ajuda halo reabilitasaun permanente ba estrada sira iha área Postu Administrativu Matebian, liuliu ba fatin-fatin istóriku,” nia hateten.
(tom)
