DÍLI, STLTIMORLESTE.com – Prezidente Komisaun Rekrutamentu no Selesaun Juri ba Juiz Supremu Tribunal Justisa (STJ) no Tribunal Rekursu (TR), Avelino Coelho hateten, ezame eskrita ba konkursu Tribunal Rekursu (TR) hala’o loron 25 no 28 Setembru 2026.
Nia hateten katak, total konkorente ne’ebé tuir konkursu ba TR hamutuk nain 22, no konkursu ne’e destina de’it ba Juiz kareira. Vaga ne’ebé disponivel ba TR hamutuk nain sia (9).
“Ezame eskrita ba Tribunal Rekursu hala’o iha loron rua, loron 25 no loron 28, no total konkorente 22. Konkursu ba TR ne’e de’it ba Juizes,” dehan Avelino Coelho ba jornalista sira iha Mandarin, Segunda-feira (28/09/2026).
Nia esplika, konkursu ba Supremu Tribunal Justisa (STJ) loke oportunidade ba Juizes, Prokuradores no Juristas, tuir sistema meritu no kritériu ne’ebé estabelese.
Ba konkursu TR, de’it Juiz kareira mak bele konkore. Kandidatu ne’ebé la’ós Juiz kareira sei deskualifika no la bele kontinua iha prosesu konkursu.
Depois de ezame eskrita remata, teste sira sei korrije no avalia husi Juri. Rezultadu sei notifika diretamente ba konkorente sira. Kandidatu ne’ebé pasa faze eskrita sei kontinua ba faze entrevista profissional.
Enkuantu kandidatu ne’ebé la pasa teste eskrita, sei iha tempu loron 10 atu halo reklamasaun ba Juri.
Avelino hateten katak, tuir regra, pontuasaun atu konsidera kandidatu liu sei iha interval 10 to’o 20, maibé desizaun final sei depende ba Juri, tuir kritériu ne’ebé aplika.
Avelino mós esplika kona-ba situasaun Juiz nain ha’at iha Tribunal Rekursu ne’ebé atualmente hala’o knaar hanesan Juiz Desembargador no, iha tempu hanesan, hala’o knaar iha Supremu Tribunal Justisa, liuliu iha área matéria konstitusional.
Juiz nain ha’at ne’e tuir konkursu ba STJ. Maibé, ba konkursu TR, sira la tuir no deklara katak sira sei kontinua iha sira-nia kargu atual, no sira konkore de’it ba vaga STJ.
Nune’e, se Juiz nain ha’at ne’e la pasa konkursu STJ, sira sei kontinua hala’o knaar iha TR. Maibé, se sira pasa no sai parte husi STJ, vaga sira-nia iha TR sei mamuk no sei presiza prenxe fali.
“Se sira nain ha’at liu ba STJ, maka iha Juiz nain sia sei prense vaga ne’ebé mamuk iha TR. Maibé, se sira la liu, sira sei mantein nafatin iha TR, no sei aumenta de’it Juiz nain lima atu prenxe vaga restante,” dehan Avelino.
Avelino mós hateten katak, kandidatu ne’ebé la pasa iha teste eskrita sei iha oportunidade atu halo rekursu ka reklamasaun ba Juri, no Juri sei analiza no foti desizaun kona-ba reklamasaun ne’e.
Nia sublinha katak, se kandidatu sira pasa iha faze eskrita no entrevista, desizaun kona-ba seleksaun final sei bazeia ba rezultadu no kritériu ne’ebé estabelese.
Ba STJ, konkursu envolve Juizes, Prokuradores no Juristas. Enkuantu ba TR, konkursu destina de’it ba Juizes kareira.
Iha sorin seluk, Akademiku Universidade Nasionál Timor Lorosa’e (UNTL), Rafael de Jesus, hateten katak prosesu ezame no selesaun ba Juiz STJ no TR tenke hala’o ho rigor.
Nia konsidera katak, prosesu ne’e importante atu garante katak ema ne’ebé iha kapasidade no kompeténsia di’ak mak sei ocupa kargu iha instánsia judisiária sira ne’e.
“Teste sira ne’e tenke halo ho rigor, atu ema ne’ebé tur iha STJ iha kapasidade di’ak atu lori justisa lao ba oin,” dehan Rafael de Jesus.
Nia hatutan, iha tempu agora, públiku balu preocupa kona-ba prestasaun servisu iha área justisa. Tanba ne’e, prosesu rekrutamentu no selesaun ba Juiz STJ no TR konsidera importante tebes atu hala’o ho rigor no transparénsia, atu garante katak Juizes ne’ebé hili iha kapasidade di’ak atu hala’o sira-nia responsabilidade iha sistema justisa.
(ter)
