DILI, STLTIMORLESTE.com — Primeiru-Ministru (PM) Kay Rala Xanana Gusmão, Segunda-feira (28/09/2026), hasoru delegasaun United Nations Electoral Needs Assessment Mission (UN NAM) atu diskute nesesidade apoiu ba prosesu no preparasaun eleisaun iha Timor-Leste.
Ministru Administrasaun Estatál (MAE), Tomás do Rosário Cabral, hateten ba jornalista sira iha Palásiu Governu katak enkontru ne’e diskute apoiu hosi ajénsia Nasaun Unidas ba eleisaun Prezidensiál, eleisaun Governu Lokál no eleisaun Parlamentár.
“Enkontru ho Primeiru-Ministru hamutuk ho reprezentante ajénsia Nasaun Unidas sira ko’alia liu-liu kona-ba eleisaun, atu apoia STAE, CNE no sosiedade sivíl,” Tomás Cabral hateten.
Tuir nia, Sekretariadu Tékniku Administrasaun Eleitorál (STAE) sei servisu hamutuk ho Programa Nasaun Unidas ba Dezenvolvimentu (PNUD) atu prepara kondisaun ba realizasaun eleisaun sira.
Apoiu ne’e sei inklui edukasaun sívika, rejistu biométriku, preparasaun ba eleisaun iha rai-li’ur no prosedimentu seluk ne’ebé relasiona ho prosesu eleitorál.
Tomás Cabral mós hateten katak Governu sei kontinua ko’ordena ho parseiru internasionál sira kona-ba kooperasaun no partisipasaun observadór internasionál iha prosesu eleitoral.
Nia esplika katak Primeiru-Ministru husu atu observadór internasionál sira halo observasaun la’ós de’it iha Dili, maibé mós iha suku sira, atu bele avalia prosesu eleitorál iha nível lokal.
“Observadór ne’e importante, tanba misaun ONU mai iha ne’e atu haree demokrasia iha ita-nia rai,” Tomás Cabral hateten.
Enkuantu ne’e, Zoran Trajkovski, hosi Divizaun Asisténsia Eleitorál, Departamentu ONU ba Assuntu Polítiku no Hari’i Dame, hateten katak UN NAM hala’o misaun avaliasaun atu identifika nesesidade no tipu apoiu eleitorál ne’ebé Timor-Leste presiza, tuir pedidu Governu Timor-Leste.
Delegasaun UN NAM akompaña mós hosi Ministru Administrasaun Estatál Tomás do Rosário Cabral no Reprezentante PNUD, Kartyna Argueta.
Timor-Leste sei hala’o eleisaun Prezidensiál no eleisaun ba Governu Lokál iha 2027, enkuantu eleisaun Parlamentár sei realiza iha 2028.
Preparasaun ba eleisaun sira-ne’e sei envolve ko’ordenasaun entre instituisaun eleitorál nasionál no parseiru internasionál sira, ho objetivu atu apoia prosesu eleitorál ne’ebé transparente, inkluzivu no kredível.
(jos)
