DILI, STLTIMORLESTE.com – Komunidade no negosiante sira husu atu rai osan iha banku, hodi prevene risku lakon tanba inséndiu, na’ok ka akontesimentu seluk.
Sekretáriu Eleitu Konsellu Libertasaun Nasional (CLN) Munisípiu Bobonaro, Nicolao Moniz “Terus Lakikit”, husu komunidade, liuliu negosiante sira, atu labele rai osan ho montante boot iha uma.
Nia hatete, osan ne’ebé ema hetan husi servisu no atividade negósiu durante tempu naruk bele lakon iha tempu badak, se akontese inséndiu ka na’ok.
“Agora ita nia nasaun iha banku barak ona. Diak liu rai osan iha banku atu asegura osan no sustenta nesesidade família nian iha futuru,” dehan Nicolao ba STL iha edifísiu CLN Maliana, Segunda-feira (28/09/2026).
Nia halo apelu ne’e depois inséndiu iha Merkadu Taibessi ne’ebé sunu osan no sasan barak, no halo negosiante balun lakon patrimóniu.
Tuir Nicolao, rai osan iha banku bele ajuda komunidade proteje osan ne’ebé sira hetan husi rezultadu servisu no negósiu.
Nia rekomenda governu, liuliu instituisaun bankária, atu aumenta sosializasaun to’o iha komunidade no merkadu sira kona-ba objetivu no benefísiu rai osan iha banku.
Nicolao hatete komunidade balun seidauk fiar banku tanba rona informasaun ne’ebé la loos kona-ba osan ne’ebé ema rai iha banku sei lakon ka banku sei taka.
Tuir nia, banku presiza aumenta prezensa no edukasaun finanseira iha komunidade, hodi fó esplikasaun ne’ebé klaru kona-ba servisu bankária no seguransa osan.
Nia hatete, se laiha informasaun ne’ebé klaru, komunidade sei kontinua rai osan iha pasta, carteira ka uma, ne’ebé aumenta risku lakon bainhira akontese inséndiu ka na’ok.
Iha sorin seluk, Silvina Soares, ema ne’ebé hala’o negósiu rai no fó empréstimu osan, hatete inséndiu Merkadu Taibessi halo ema barak laran-moras tanba osan no sasan ne’ebé sira hetan durante tinan barak lakon iha tempu badak.
“Hau hanoin akontesimentu nee fó hanoin ba ita hotu atu labele rai osan iha pasta ka uma, maibé tau iha banku hodi proteje no asegura nafatin,” dehan Silvina.
Nia mos husu governu no instituisaun bankária atu halo sosializasaun kona-ba benefísiu rai osan iha banku, liuliu ba komunidade no negosiante sira ne’ebé hetan rendimentu husi atividade negósiu.
Xefe Jestor Merkadu Taibessi, Anibal de Jesus hatete, inséndiu ne’e akontese tanba konsletu hosi fiu eletrisidade iha besi-rin leten.
Tuir Anibal, fiu eletrisidade ne’e todan no monu ba kios ida, nune’e ahi hahú sunu kios antes espalla ba fatin sira seluk.
Nia hatete, negosiante sira iha área ne’ebá fa’an sasan oioin, inklui telefone, roupa no sasan kios nian, maibé tanba ahi lakan maka’as, sasan barak la konsege salva.
Depois akontesimentu, ekipa jestaun merkadu hamutuk ho autoridade nasional halo rejistu ba sasan sira ne’ebé hetan estragus, no dadus sira ne’e hato’o ona ba superior.
Anibal esplika katak, negosiante balun tau sasan de’it iha merkadu, maibé maioria hela no toba iha fatin negósiu tanba sira hala’o atividade negósiu iha merkadu.
Tanba inséndiu, fatin hela negosiante sira nian mos hetan estragus, nune’e sira labele kontinua hala’o atividade negósiu hanesan antes.
Iha akontesimentu ne’e, ema na’in tolu ne’ebé haree ahi no halai sai hosi fatin hetan kanek tanba besi kona sira.
Ekipa saúde kontaktu kedas no lori ema sira ne’ebé hetan kanek ba ospitál. Tuir informasaun, kanek sira ne’e kaman no la grave.
Anibal rekomenda parte relevante sira atu tau atensaun ba situasaun negosiante sira ne’ebé hela iha merkadu, tanba sira lakon fatin hela no fatin servisu.
Negosiante Siquito de Oliveira Mendonsa hatete inséndiu ne’e sunu hotu nia fatin fa’an sasan no sasan negósiu sira.
“Hau nia fatin ahi han hotu. Sasan ne’ebé hau fa’an hanesan pasta, sapatu, buli no rice cooker. Momentu ahi akontese, hau la hatene tanba hau ba halo uma lisan iha foho,” dehan Siquito.
Nia hatete, momentu inséndiu akontese, nia fatin fa’an taka hela tanba nia ba halo uma lisan iha foho.
(dom)
