BAUCAU, STLTIMORLESTE.com – Insendiu ne’ebé akontese iha Aldeia Caisidu, Suku Tirilolo, Postu Administrativu Baucau Vila, Munisípiu Baucau, rezulta uma rua ne’ebé pertense ba família rua mutuk totál no vítima ida hetan kanek iha liman.
Komandante Operasaun Autoridade Protesaun Sivíl (APC) Munisípiu Baucau, Francisco Viana Freitas, informa katak insendiu akontese iha loron 29 Setembru pur-volta tuku 15:15 loraik. Ekipamentu bombeiru Munisípiu Baucau to’o kedas iha fatin atu halo operasaun hamate ahi, maibé la konsege salva uma rua refere.
“Informasaun mai dehan ahi han uma hela fatin. Ita nia bombeiru hamate ahi, maibé uma rua iha família rua mutuk totál,” hateten Francisco Viana Freitas ba jornalista sira iha fatin insendiu, Tirilolo, Kuarta (30/09/2026).
Nia esplika katak, insendiu ne’e la’ós de’it estraga estrutura uma, maibé sasan sira iha uma laran ne’ebé pertense ba família rua mutuk totál.
Iha prosesu atu salva sasan, vítima feto ida ne’ebé hanesan nain uma tenta tama fali ba uma atu hasai sasan no osan balu ne’ebé iha armáriu. Maibé, ahi kona nia liman rua no nia hetan kanek.
“Ferik nain uma ida atu ba salva nia sasan iha armáriu, mak nia liman rua ahi kona, maibé kanek kamaan,” Francisco informa.
Kauza seidauk klaru
Francisco hateten, to’o agora APC Munisípiu Baucau seidauk bele determina kauza prinsipál husi insendiu refere.
Tuir nia, vítima sira rasik mos seidauk hatene ho klaru origem husi ahi ne’ebé hahu han uma rua refere.
Depois husi akontesimentu, APC Munisípiu Baucau fó ona apoiu emerjénsia ba vítima sira, inklui ai-han no nesesidade báziku sira seluk.
APC mos halo ona levantamentu dadus kona-ba danos no kondisaun vítima sira, ne’ebé relata ona ba autoridade nivel nasionál hodi hein apoiu material ba prosesu rekuperasaun.
Vítima na’in 7 hela provizoriamente
Insendiu ne’e afeta diretamente família rua, ho total vítima hamutuk na’in hitu. Tanba sira-nia uma lakon, família sira agora hela provizoriamente iha uma família seluk.
APC Munisípiu Baucau apela ba komunidade atu aumenta kuidadu ho atividade ne’ebé bele hamosu ahi, inklui evita sunu rai arbiru.
Autoridade mos lembra komunidade katak, bainhira sai husi uma, tenke asegura instalasaun eletrisidade no ekipamentu sira ne’ebé bele hamosu risku insendiu nune’e bele prevene akontesimentu hanesan ne’e.
To’o notísia ne’e publika, STL seidauk hetan komentáriu diretamente husi vítima sira no autoridade lokál kona-ba insendiu refere.
(tom)
