DILI, STLTIMORLESTE.com – Parlamentu Nasionál (PN) reeleje José Agostinho da Costa Belo nu’udar Prezidente Komisaun Nasionál Eleisaun (CNE) ba mandatu foun tinan 5, 2026–2031, liuhusi votasaun iha plenária.
José Agostinho da Costa Belo, kandidatu úniku ba Prezidente CNE, hetan votu 45 afavór, 15 kontra no abstensaun 3, iha eleisaun ne’ebé hala’o iha Parlamentu Nasionál, kuarta (30/09/2026).
Iha eleisaun ne’e, deputadu sira mós hili membru efetivu na’in-rua no membru suplente na’in-tolu husi Parlamentu Nasionál atu reprezenta instituisaun ne’e iha CNE.
Pakote kandidatu ba membru efetivu ne’ebé PN indijita hetan votu 59 a favór, 2 kontra, abstensaun 1 no votu nulu 1, ho prezensa deputadu na’in-63 no deputadu na’in-rua la marka prezensa.
Liuhusi rezultadu votasaun ne’e, Odete Maria Belo no Leonardo Amaral hetan konfiansa deputadu sira atu sai membru efetivu CNE, reprezenta Parlamentu Nasionál.
Prezidente Parlamentu Nasionál, Fernanda Lay esplika katak, membru balun ne’ebé eleitu ona iha kompozisaun CNE antes ne’e, inklui José Agostinho da Costa Belo no Odete Maria Belo.
“Ha’u hanoin senhor José Agostinho da Costa Belo ne’e uluk iha ne’ebá ona. Aleinde ne’e, señora Odete Maria Belo mos iha ne’ebá ona. Ida foun mak senhor Leonardo Amaral,” Fernanda Lay hateten iha plenária.
Ba membru suplente, Parlamentu Nasionál indijita António Amaral Ximenes Pereira, Paula Flamina da Silva no Zalia atu reprezenta instituisaun ne’e iha CNE.
Antes ne’e, Bankada CNRT propoin José Agostinho da Costa Belo no Odete Maria Belo ba membru efetivu, enkuantu Bankada FRETILIN propoin Leonardo Amaral.
Bankada CNRT mós propoin António Amaral Ximenes Pereira no Paula Flamina da Silva ba membru suplente iha Komisaun Nasionál Eleisaun.
Entretantu, Governu liuhusi Konsellu Ministru nomeia Élviro Fernandes Monis nu’udar membru efetivu no Odete Maria Belo nu’udar membru suplente ba CNE.
Tuir Lei Administrasaun Eleitorál, Prezidente Parlamentu Nasionál mak sei fó pose ba membru CNE sira hafoin prosesu dezignasaun remata.
Kompozisaun foun CNE ne’e sei hala’o kna’ar iha mandatu 2026–2031, hodi asegura supervizaun ba prosesu eleitorál sira iha Timor-Leste, tuir kuadru konstitusionál no legal ne’ebé vigora.
(alb)
