DÍLI, STLTIMORLESTE.com — Eskola Ensinu Básico Católica (EBC) Santa Bernadette Soubirous Aimutin hametin espiritualidade estudante sira liuhusi orasaun, leitura Evanjellu, meditasaun no formasaun.
Diretora EBC Santa Bernadette Soubirous Aimutin, Me. M. Misella, PRR, hato’o informasaun ne’e ba STL iha Aimutin, Kinta (1/10/2026).
“Orasaun loron-loron hametin espiritualidade estudante sira.”
Me. Misella hatete, antes hahu prosesu aprendizajen, estudante sira hamutuk hodi loke loron ho orasaun.
Programa ne’e komesa ho leitura evanjellu, tuir mai orasaun espontánea ne’ebé dirije diretamente husi estudante sira rasik.
Leitura Evanjellu ajuda estudante sira konese no komprende Maromak nia liafuan, no aplika mensajen ne’ebé sira aprende iha moris loroloron.
Kada loron Sesta dader, eskola hala’o meditasaun bazeia ba Evanjeliu ne’ebé lee ona, hodi fó oportunidade ba estudante sira atu halo reflesaun.
Estudante sira mós aprende oinsá aplika mensajen Evanjeliu iha sira-nia moris loroloron liuhusi atividade meditasaun.
Aleinde ne’e, kada Sabdu estudante sira hamutuk halo orasaun tersu, nu’udar parte husi pratika espiritualidade Kongregasaun PRR.
Iha fulan Maiu no Outubru, eskola organiza peregrinasaun ba Gruta Comoro, Gruta Madre PRR Aimutin no Gruta Madre PRR Manleuana.
Enkuantu iha fulan Setembru, nu’udar Fulan Bíblia, eskola fó formasaun Bíblia ba estudante sira kada semana, liuliu iha loron Sabdu.
Eskola mós hala’o misa hamutuk ho estudante sira iha abertura tinan letivu foun no remata tinan letivu.
Ba dezenvolvimentu espiritualidade, eskola organiza programa retiru kada tinan ba estudante Segundu Siklu no Terseiru Siklu.
Programa retiru inklui estudante Sextu Ano to’o Nunu Ano, ho atividade ne’ebé foka ba dezenvolvimentu vida espiritual no formasaun karakter.
Iha loron 3 no 4 Outubru 2026, estudante Nunu Ano sei partisipa iha atividade retiru ne’ebé sei hala’o iha SEPAL, Hera.
Programa sira ne’e parte husi esforsu EBC Santa Bernadette Soubirous Aimutin atu dezenvolve estudante iha área akademika no hametin vida espiritual.
(joa)
