DILI, STLTIMORLESTE.com – Tribunál Judisiál Primeira Instánsia Dili (TJPID) iha loron Kinta (01/10/2026) hala’o julgamentu ba kazu krime burla agravada ne’ebé envolve arguidu inisiál DSX, ne’ebé alegadamente foti osan US$ 2.300 resin hosi lezada YL.
Tuir akuzasaun, arguidu DSX no lezada YL servisu hamutuk iha kompanhia ida neebe okaliza iha Pantai Kelapa, Dili. Arguidu servisu nu’udar sales representative, ho responsabilidade atu lori no distribui sasan komersiál ba kioske sira.
Tuir faktus iha autos, entre Dezembru 2020 no Maiu 2021, arguidu lori sasan komersiál ba kioske sira, inklui foos, mina, bee, serveza Bintang no ABC, super mi, teh Pucuk no sasan alimentasaun seluk. Valor sasan ne’ebé distribui durante períodu ne’e hamutuk aproximadamente US$ 2.315,41.
Akuzasaun alega katak, osan hosi venda sasan ne’ebé arguidu rekolla hosi kioske sira la entrega ba kompanhia, maibé arguidu uza ba nia nesesidade rasik.
Lezada depois husu kompanhia atu koa arguidu nia salariu hodi selu fila-fali osan ne’ebé lakon. Maibé, arguidu deside sai hosi servisu no, tuir akuzasaun, la selu fila-fali osan ne’ebé nia simu.
Lezada deklara iha tribunal katak, nia lakon osan liuhusi US$ 2.300 depois deskobre hosi nota sira no ba husu diretamente ba kioske sira ne’ebé arguidu distribui sasan. Kioske sira hatete katak sira selu ona osan ba arguidu, maibé osan ne’e la to’o ba kompanhia.
Lezada mós deklara katak, arguidu rekoñese nia foti osan, tanba ne’e kompanhia koa nia salariu atu kompensa prejuízu. Maibé, depois arguidu sai hosi servisu, nia la kontaktu tan lezada atu selu fila-fali osan.
Tribunal, hafoin rona deklarasaun lezada, deside adia julgamentu ba 13 Outubru 2026, tuku 14:00, atu rona deklarasaun testemuña.
Julgamentu ne’e prezide hosi kolektivu juízes ne’ebé kompostu husi Ivan Patrocenio, Argentino Nunes no juíza estajiária ida. Ministériu Públiku reprezenta hosi Prokurador Napoleão de Jesus, enkuantu arguidu hetan asisténsia legal hosi Defensora Públika Laura.
(ter)
