DILI, STLTIMORLESTE.com – Ministériu Públiku (MP) liuhusi alegasaun iha julgamentu iha Tribunal Kolektivu, husu atu kondena arguidu inisiál JdS ho pena prizaun efetiva tinan 5, tanba alegadu krime korupsaun pasiva.
Iha alegasaun Kinta-feira, 1 Outubru 2026, Prokurador Nelson Magno deklara katak, ofendidu entrega osan US$ 5.000 ba arguidu, ne’ebé iha tempu ne’ebá asumi knaar nu’udar Vise-Ministru MNEK, ho promesa atu ajuda ofendidu sai Embaixador iha nasaun seluk.
MP konsidera katak, arguidu simu duni osan hosi ofendidu no husu Tribunal atu altera kualifikasaun jurídika hosi burla agravada ba korupsaun pasiva.
Tuir faktus iha prosesu, iha tinan 2020, ofendidu BL koñese arguidu liuhusi nia alin RLG, ne’ebé koñese di’ak ho ASdC. Tuir akuzasaun, ASdC no arguidu iha ligasaun ho proposta atu ajuda ofendidu sai Embaixador.
Iha 27 Jullu 2020, testemuña RLG informa ba ofendidu atu prepara Curriculum Vitae (CV) no osan US$5.000 atu entrega ba arguidu iha nia fatin servisu, MNEC, Pantai Kelapa, Dili.
Iha 30 Jullu 2020, ofendidu halo levantamentu osan US$ 5.000 hosi BNCTL. Iha loron hanesan, por volta tuku 14:00, ofendidu hamutuk ho testemuña RLG no AdSC entrega osan ne’e ba arguidu.
Tuir akuzasaun, osan ne’e entrega tanba promesa atu nomea ofendidu nu’udar Embaixador, maibé promesa ne’e la realiza. Konsekuénsia hosi hahalok ne’e, ofendidu lakon osan US$ 5.000.
MP konsidera katak, arguidu halo hahalok ne’e ho intensaun atu hetan benefísiu ilejítimu no hatene katak nia hahalok bele hamosu prejuízu ba ofendidu.
Enkuantu ne’e, defeza arguidu nian ne’ebé reprezenta hosi Advogadu Privadu Ismael Asunsao Lopez, rejeita akuzasaun. Defeza deklara katak arguidu la hasoru diretamente ho ofendidu, maibé hasoru ho testemuña RLG no AdSC atu ko’alia kona-ba asuntu projetu.
Arguidu, tuir defeza, mós deklara iha tribunal katak nia nunka husu osan ba testemuña AdSC no nia la iha kompeténsia atu nomea sidadaun Timor-Leste sai adidu ka Embaixador.
Tanba ne’e, defeza husu Tribunal atu absolve arguidu. Kona-ba pedidu MP atu altera kualifikasaun jurídika hosi burla agravada ba korupsaun pasiva, defeza la halo opozisaun, maibé nafatin husu atu absolve arguidu.
Hafoin rona alegasaun husi MP no defeza, Tribunal adia prosesu ba loron seluk atu halo leitura akordaun.
Julgamentu ne’e prezide hosi kolektivu juízes, ho Arjentino Nunes nu’udar juíz prosesu no Ivan Patrocenio nu’udar juíz adjuntu, hamutuk ho juíza estajiária ida. MP reprezenta hosi Prokurador Nelson Magno, enkuantu arguidu hetan asisténsia legal hosi Advogadu Privadu Ismael Asunsao Lopez.
(ter)
