DILI, STLTIMORLESTE.com — Polísia Nasional Timor Leste (PNTL) Munisípiu Dili hametin patrullamentu no kooperasaun ho komunidade atu prevene konflitu no violénsia.
Komandante PNTL Munisípiu Dili, Komisáriu Asistente Polísia Orlando Gomes hatete, medida ne’e importante atu mantein seguransa públika.
Nia hatete, polísia kontinua halo observasaun no patrullamentu iha área ne’ebé identifika hanesan fatin risku, atu monitoriza movimentu komunidade.
Orlando Gomes esplika, patrullamentu ne’e objetivu atu prevene konflitu ne’ebé bele hamosu violénsia iha komunidade.
“Polísia mantein komunikasaun ho komunidade no lideransa lokál atu fasilita troka informasaun kona-ba konflitu,” hatete Orlando Gomes ba STL.
Deklarasaun ne’e nia hato’o iha Eskuadra Dom Alexu Aimutin, Dili, sexta-feira (02/10/2026).
Nia argumenta, bainhira konflitu envolve violénsia, Polísia bele hahú prosesu kriminál tuir natureza kazu no evidénsia disponível.
Aleinde patrullamentu, Polísia presiza servisu hamutuk ho lideransa komunitária atu halo intervensaun sedu antes konflitu sai boot.
Lideransa komunitária mós iha papél importante atu informa Polísia kona-ba problema ne’ebé mosu iha komunidade.
Nunee mos Xefe Suku Comoro, Eligio José Marçal hatutan, konflitu iha suku ne’e menus tanba joven sira promove unidade, dame no buka servisu.
“Konflitu iha Suku Comoro menus, tanba joven barak lakohi problema. Bainhira konflitu mosu, ami informa Polísia atu atua lalais,” nia afirma.
Nia hatete, kooperasaun entre autoridade lokál, Polísia no komunidade importante atu prevene konflitu no mantein estabilidade iha Suku Comoro.
(jen)
