DÍLI, STLTIMORLESTE.com — Polísia Nasional Timor-Leste (PNTL) Munisípiu Dili sei aplika koima ba kareta no motor ne’ebé estasiona iha estrada públika.
Komandante PNTL Munisípiu Dili, Komisáriu Asistente Polísia Orlando Gomes husu sidadaun sira uza parajen privadu atu evita okupa estrada.
Nia hatete, okupasaun estrada bele impede movimentu transporte, liuliu veíkulu emerjénsia ne’ebé presiza asesu lalais ba fatin kazu.
“Ita husu sidadaun sira uza parajen privadu, atu labele okupa estrada no fasilita movimentu emerjénsia.”
Orlando Gomes hatete, estrada tama-bairu iha kapital Dili barak reabilita ona, maibé rezidente balun kontinua uza estrada ba estasionamentu.
Komandu PNTL Dili mós apela ba motorista sira atu buka fatin apropriadu ba estasionamentu no labele para iha estrada ninin.
Nia informa, PNTL Dili sei kordena ho Sekretaria Estadu Asuntu Toponímia no Organizasaun Urbana (SEATOU) atu kontrola estasionamentu.
“Komandu PNTL Dili sei kordena ho SEATOU atu kontrola kareta sira ne’ebé para iha estrada ninin no aplika koima tuir lei.”
Nunee mos iha Suku Comoro, Postu Administrativu Dom Aleixo, Gil de Jesus hatete, komunidade enfrenta falta parajen tanba espasu rai limitadu.
Nia hatete, balun konsidera estrada ninin hanesan espasu alternativu tanba rai besik uma sira barak uza ona ba konstrusaun.
“Hakarak parajen iha estrada ninin la diak, maibé rai pedasuk limitadu, tanba espasu iha uma oin mós menus.”
(jen)
