BAUCAU, STLTIMORLESTE.com – Ema na’in rua (2) hetan kanek grave hafoin motor Trail no kareta Carry soke malu iha área Odamatan Boot, Postu Administrativu Laga, Munisípiu Baucau, iha Sesta dader ne’e (02/10/2026).
Vítima nain rua ne’e mak Gregorio Caetano no Alfiana dos Santos, husi Bauro, Postu Administrativu Lautém, Munisípiu Lautém. Sira uza motor Trail ho númeru matríkula AB-3767 atu ba Dili, maibé to’o iha área Odamatan Boot, Laga, hetan asidente tanba soke malu ho kareta Carry ho númeru matríkula B-17941, kór metan.
Asidente ne’e rezulta vítima nain rua hetan kanek grave no hetan tratamentu iha Sala Emerjénsia Hospital Regional Eduardo Ximenes (HoREX) Baucau.
Médiku Sala Emerjénsia HoREX, Evangelino Soares, hateten katak vítima feto, Alfiana dos Santos, sofre fratura segmentál iha parte kesu, akompaña ho ran sai barak husi inus no ibun tanba hetan impaktu maka’as.
“Molok to’o mai emerjénsia, asidente iha área Laga ne’ebá lori ba Sentru Saúde Laga, depois lori mai iha ne’e. Feto ne’e lakon konsiénsia, nia nivel konsiénsia tun, ran sai husi ibun no taka nia iis. Ami halo esforsu hodi salva, maibé ikus liu ami halo intubasaun,” hateten Evangelino Soares ba jornalista sira iha Sala Emerjénsia HoREX Baucau, hafoin fó asisténsia médika ba vítima feto ne’e, Sesta (02/10/2026).
Haree ba kondisaun vítima feto ne’ebé grave, ekipa médika HoREX foti desizaun atu halo transferénsia ba Hospital Nasional Guido Valadares (HNGV), Dili, hodi halo ezame CT Scan no hetan tratamentu espesializadu.
Maibé, tanba kondisaun vítima la favorável atu halo transferénsia iha momentu ne’e, ekipa médika deside kontinua tratamentu no monitorizasaun iha HoREX, hodi akompaña evolusaun kondisaun vítima.
“Kondisaun agora grave. Ita fó hatene tiha ona família kona-ba kondisaun pasiente no risku sira ne’ebé bele akontese,” informa Evangelino Soares.
Enkuantu ne’e, vítima mane, Gregorio Caetano, sofre fratura iha ain parte loos no mos hetan tratamentu médiku iha HoREX.
Alberita dos Santos Caetano, ne’ebé akompaña família vítima, husu ba ekipa médika atu kontinua fó asisténsia tomak ba vítima nain rua, ho esperansa sira bele rekupera no kontinua sira nia atividade.
“Hau husu mediku sira halo buat hotu ne’ebé presiza, atu alin nain rua ne’e nia kondisaun bele diak no bele fila fali ba sira nia estudu,” hateten Alberita.
Tuir Alberita, vítima nain rua ne’e husi Lautém ba Dili ho objetivu atu tuir teste lian Japonés, maibé iha dalan, to’o iha área Laga, sira hetan asidente.
Ba kazu ne’e, Polísia Tráfiku Munisípiu Baucau to’o ona iha fatin asidente hodi rekoilha evidénsia sira no halo investigasaun kona-ba kauza asidente.
(tom)
