DÍLI, STLTIMORLESTE.com – Polísia Sientífika Investigasaun Kriminal (PSIK) detein sidadaun estranjeiru 16 suspeitu halo atividade Scam Call Centre uza banner Polísia Japaun iha Becora.
Operasaun Polísia Sientífika Investigasaun Kriminal (PSIK) ne’e hala’o iha Solo Otel, área Au-hun, Suku Becora, Dili, Sesta-madrugada, tuku 03:00.
Inisialmente, PSIK detein sidadaun estranjeiru 14 iha fatin. Sidadaun estranjeiru na’in 2 seluk halai no subar, maibé autoridade konsege kaptura fali sira.
Sidadaun estranjeiru 16 ne’e kompostu hosi ema hitu ho nasionalidade Japaun, na’in haat Xina, na’in rua Taiwan no na’in ida Komboja.
Na’in rua ne’ebé kaptura ikus sei kontinua prosesu identifikasaun hosi autoridade kompetente atu determina sira nia identidade.
Tuir fonte ne’ebé konfirmadu, grupu ne’e suspeitu instala banner Polísia Japaun nian atu hala’o atividade Scam Call Centre.
Durante operasaun, PSIK aprende banner, komputador ida, rádio komunikasaun tolu, atributu farda no xapeu Polísia Japaun nian.
PSIK mós aprende kareta ida, telemovel, pasaporte, laptop no ekipamentu eletróniku seluk ne’ebé konsidera relevante ba investigasaun.
Sidadaun estranjeiru na’in 16 agora detein iha PSIK hodi kontinua prosesu investigasaun kona-ba atividade ne’ebé sira suspeitu hala’o.
(jen)
