DILI, STLTIMORLESTE.com – Tersu nuudar dalan orasaun neebe lori fiar nain sira besik liu tán ba Maromak, liu husi devosaun ba Nain Feto, iha fulan Rosáriu.
Liafuan nee furak nee hatoo husi, Padre Matias M. M. de Jesus Pinto, SDB ba STL iha Eskola São Pedro Comoro, Sesta (2/10/2026).
Padre Matias hatete, katak devosaun ba Nain Feto laos atu halo Nain Feto sai sentru adorasaun, maibé nuudar dalan atu lori Kristaun sira besik ba Jesus.
“Ita besik Nain Feto no besik ba Jesus,” dehan nia.
Nia esplika katak, iha Igreja Katólika, fulan Maiu no fulan Outubru sai tempu importante ba fiar nain sira, atu hatudu devosaun ba Nain Feto.
Liu liu, fulan Outubru konsidera nuudar Fulan Rosáriu, loron ne’e dedika ba Rosáriu no komemora vitória iha Batalha de Lepanto, 7 Outubru 1571, ne’ebé tradisaun Katólika liga ho orasaun Rosário iha loron 7 Outubru nu’udar festa Nossa Senhora do Rosário.
Tuir nia, orasaun Rosáriu importante tanba iha Rosáriu fiar-na’in sira kontempla moris no mistériu Jesus Kristu liu husi intersesaun Nain Feto.
“Rosáriu nia sentru mak Jesus Kristu.”
Padre Matias hateten katak, orasaun ba Nain Feto laós atu adora ba Maromak, maibé liu husi Nain Feto, fiar-na’in sira lori nia orasaun ba Maromak.
Nia mos temi Santu Domingos, ne’ebé tradisaun Igreja Katólika liga ho entrega Rosáriu ba nia, hodi fahe devosaun no orasaun ne’e ba fiar-na’in sira.
Tuir Padre Matias, Tersu ka Rosáriu laos deit ba ema matenek ka ema ho nivel edukasaun aas, maibé ba ema hotu.
Tersu sai instrumentu ida atu ajuda ema hotu, komprende no hametin sira nia relasaun ho Maromak liu husi orasaun.
(joa)
