DILI, STLTIMORLESTE.com — Governu Japaun entrega kareta bombeiru lima (5) ba Governu Timor-Leste (TL), ho apoiu finanseiru US$ 333.987, hodi hametin kapasidade resposta ba inséndiu no emerjénsia, inklui dezastre naturál, iha Munisípiu Dili no Lautém.
Entrega ekipamentu ne’e hala’o husi Embaixadór Japau ba Timor-Leste, Yamamoto Yasushi ba Primeiru-Ministru Kay Rala Xanana Gusmão, iha serimónia ofisiál iha Palásiu Governu, Dili, Tersa-feira (13/10/2026).
Iha serimónia ne’e, Primeiru-Ministru Xanana Gusmão, lori Governu no povu Timor-Leste nia naran, hato’o agradesimentu ba Governu Japau tanba kontinua fó apoiu ba Timor-Leste, hahú hosi restaurasaun independénsia to’o ohin loron.
“Hau lori Governu no povu Timor-Leste nia naran atu hato’o agradesimentu no gratidaun ba Governu Japau, ne’ebé kontinua apoia Timor-Leste iha setór oioin, liuliu ohin loron entrega ekipamentu atu atende inséndiu no dezastre naturál sira ne’ebé afeta povu Timor-Leste,” dehan Primeiru-Ministru Xanana Gusmão.
Nia apresia apoiu Japau nian ne’ebé la’ós de’it iha área seguransa umana, maibé mós iha setór dezenvolvimentu seluk ne’ebé importante ba moris povu nian.
Japau Hametin Solidariedade ho Timor-Leste
Embaixadór Japau ba Timor-Leste, Yamamoto Yasushi, afirma katak entrega kareta bombeiru lima ne’e sai ezemplu ida husi kompromisu no solidariedade Japau nian atu apoia seguransa no moris di’ak povu Timoroan.
Nia hateten katak, hahú hosi tinan 1999 to’o 2026, Japau kontinua sai parseiru no belun ida ba Timor-Leste, liuhosi apoiu iha área dezenvolvimentu oioin, inklui saúde, edukasaun, prevensaun inséndiu no infraestrutura komunitária.
Embaixadór Yamamoto mós hato’o esperansa katak kareta bombeiru sira-ne’e sei sai símbolu ida ba amizade no solidariedade duradoura entre nasaun rua.
Primeiru-Ministru Entrega Xavi ba Protesaun Sivil
Depois simu entrega kareta bombeiru sira, Primeiru-Ministru Xanana Gusmão hamutuk ho Embaixadór Yamamoto hala’o serimónia ofisiál kona-ba entrega xavi kareta sira. Primeiru-Ministru entrega kedas xavi hirak-ne’e ba Sekretáriu Estadu Protesaun Sivil, Domingos Mariano Reis, atu uza iha servisu prevensaun no resposta ba inséndiu no emerjénsia.
Serimónia ne’e organiza husi Autoridade Protesaun Sivil (CPA), nu’udar instituisaun ne’ebé implementa projetu ne’e, ho partisipasaun husi autoridade no funsionáriu relevante sira.
Husi kareta bombeiru lima ne’e, haat sei koloka iha Dili no kareta ida iha Munisípiu Lautém, atu hametin kapasidade resposta ba emerjénsia iha área hirak-ne’e.
Japaun Disponibiliza US$ 333.987
Governu Japau disponibiliza US$ 333.987 liuhosi programa Grant Assistance for Grassroots Human Security Projects (GGP), ne’ebé foka ba apoiu projetu komunitáriu iha área seguransa umana.
Tuir dokumentu projetu nian, to’o agora Japaun implementa ona projetu 148 liuhosi eskema GGP iha munisípiu 12 hotu-hotu no Rejiaun Administrativa Espesiál Oé-Cusse-Ambeno (RAEOA).
Projetu hirak-ne’e inklui konstrusaun no reabilitasaun infraestrutura komunitária, hanesan eskola no postu saúde, no fornese veíkulu emerjénsia atu responde ba nesesidade bázika komunidade sira.
Entrega kareta bombeiru lima ne’e espera bele ajuda Protesaun Sivil responde lalais liu ba inséndiu no emerjénsia, hodi proteje vida umana no propriedade, no haforsa kooperasaun entre Timor-Leste no Japaun iha área seguransa umana.
(jos)
