DILI, STLTIMORLESTE.com – Polísia Nasional Timor-Leste (PNTL) investiga kazu mate sidadaun Xineza, Tiago Chen, ne’ebé hetan mate iha tasi ibun Tasi-Tolu, Díli, iha Domingu dader.
Komandante PNTL Munisípiu Díli, Komisáriu Asistente Polísia Orlando Gomes konfirma katak, investigasaun ba kazu ne’e sei kontinua.
Nia hatete katak, iha oras 07:00, PNTL Eskuadra Dom Alexo simu informasaun kona-ba isin mate ida iha área tasi ibun Tasi-Tolu.
Depois simu informasaun, patrulla PNTL tun ba fatin akontesimentu hodi asegura lokal krime no kontaktu ekipa forénsika.
“Ita asegura kedas lokal krime no kontaktu ekipa forénsika. Depois, ekipa ne’e lori isin mate ba morgue HNGV atu halo autópsia,” hatete Komandante PNTL Munisípiu Díli, Komisáriu Asistente Polísia Orlando Gomes, hatete iha Eskuadra Dom Alexo Aimutin, Segunda-feira (19/10/2026).
Nia afirma katak, PNTL sei kontinua investiga kazu ne’e, tanba iha sinal mean balun iha matebian nia isin.
“Ita bolu ona matebian nia feen ba Eskuadra Dom Alexo atu rekolla informasaun. Ita sei bolu tan testemuña sira atu rona informasaun kona-ba kazu ne’e,” nia esplika.
Orlando Gomes hatete katak, depois rekolla informasaun no simu rezultadu autópsia, PNTL sei aprezenta kazu ne’e ba Ministériu Públiku (MP).
“Dadaun ne’e, kazu sei iha prosesu investigasaun. Ita seidauk bele konfirma kauza mate. Polísia sei rekolla informasaun hotu no aprezenta ba MP,” nia informa.
Entretantu, matebian nia feen, Ana Paula dos Santos, konta katak antes nia la’en lakon, sira hela hamutuk iha uma ho sira-nia oan na’in rua.
Maibé, bainhira nia fila husi vizinhu, nia la hetan ona nia la’en iha kuartu laran, maski karteira, telefone no xave motor sei hela iha uma.
“Hori kalan ami han hamutuk, no matebian tuur hela ho nia oan na’in rua. Hafoin, hau sai ba vizinhu. Bainhira hau fila, nia la iha ona,” Ana Paula dehan.
Tanba la hetan nia la’en, Ana Paula bolu sira-nia oan atu buka nia. Família ne’e buka iha fatin oioin, inklui área rai-hun no tasi ibun Kakeu, maibé la konsege hetan.
“Entaun, hau bolu hau-nia oan sira atu buka nia. Ami buka iha rai-hun no to’o tasi ibun Kakeu, maibé la hetan. Depois, ami fila fali ba uma,” nia esplika.
Ana Paula haktuir katak, iha Sábadu (17/10/2026), nia sai ba vizinhu sira iha Besi Mean atu halimar. Bainhira fila ba uma, nia la hetan nia la’en, no sira-nia oan na’in rua hela mesak.
Iha Domingu dadeer, Ana Paula simu informasaun liuhusi telefone husi nia maun, polísia Inácio, kona-ba ema ida ne’ebé hetan mate iha tasi ibun.
Informasaun ne’e mak halo nia hatene kona-ba situasaun ne’ebé akontese ba nia la’en. Ana Paula afirma katak, durante sira moris hamutuk, la iha problema iha uma laran.
Ana Paula husu autoridade kompetente atu halo autópsia no investiga kazu ne’e hodi determina kauza mate tuir prosedimentu legál.
Nia mós husu atu matebian nia isin hakoi iha Timor-Leste, hodi fasilita sira-nia oan na’in tolu atu bele vizita nia rate.
Tiago Chen, ne’ebé família bolu Lauchen, mak sidadaun Xina ho idade tinan 56 no servisu nu’udar karpinteiru.
Tuir informasaun hosi família, Tiago Chen mai Timor-Leste iha tinan 2012 no kaben ho Ana Paula iha tinan 2013. Sira hala’o kazamentu iha Igreja Katólika iha tinan 2016.
Kazada ne’e iha oan na’in tolu. PNTL kontinua hala’o investigasaun atu klarifika kauza mate no sirkunstánsia sira ne’ebé kauza matebian nia mate.
(jen)
