DILI, STLTIMORLESTE.com — Tribunal Judisiál Primeira Instánsia Dili absolve membru Polísia Nasional Timor-Leste (PNTL) inisiál BdJ, maibé kondena DM ba prizaun tinan 6 tanba kazu pekulatu kombustível.
Tribunál Koletivu liuhusi leitura akordaun, deside absolve BdJ hosi akuzasaun rua, inklui pekulatu no tráfiku influénsia. Tribunal mós determina DM selu indemnizasaun US$ 18,154.97.
“Tribunal absolve arguidu BdJ no kondena arguidu DM ba prizaun tinan neen, hamutuk ho indemnizasaun,” dehan advogadu privadu Arlindo Dias Sanches ba STL iha Tribunal Dili, Kuarta (21/10/2026).
Juíza Ersília de Jesus, Ana Paula Fonseca no José Maria de Araújo mak forma Tribunál Koletivu ne’ebé prezide audiénsia julgamentu. Ministériu Públiku reprezenta hosi prokuradora Lídia Soares.
Tribunal konsidera faktu sira ne’ebé Ministériu Públiku imputa ba BdJ la prova hotu. Tanba dúvida kona-ba nia partisipasaun, tribunal absolve nia hosi akuzasaun rua.
Iha julgamentu, DM deklara katak, depois fa’an kombustível, osan entrega ba LLG atu fahe. Maibé, nia la hatene LLG fahe osan ba BdJ ka lae.
Kona-ba LLG no DM, tribunal konsidera faktu sira ne’ebé imputa ba sira provadu. Tribunal konklui katak sira komete krime pekulatu, tuir Artigu 295 Kódigu Penál, ho forma kontinuada.
Maibé, LLG mate ona, tuir sertidaun ne’ebé aprezenta ba tribunal. Tanba ne’e, desizaun kondenasaun prizaun tinan neen no indemnizasaun aplika ba DM.
Kazu ne’e liga ho relatóriu auditoria ne’ebé Gabinete Inspesaun no Auditoria hala’o, kona-ba dívida PNTL ba kompania TOLL Timor-Leste, relasiona ho fornecimentu kombustível iha 2013.
PNTL asina kontratu ho kompania TOLL Timor-Leste atu fornese kombustível, hahú hosi 1 Janeiru to’o 31 Marsu 2013.
Tuir relatóriu, iha Fevereiru 2013, kareta-tanke ho matríkula 02-3246, ho kapasidade 3.000 litru, atesta kombustível gazoel hamutuk 6.720 litru.
Tuir akuzasaun, LLG, DM no BdJ envolve iha hasai kombustível, atesta kuantidade balun de’it ba PNTL, no fa’an kombustível restu.
Valór kombustível ne’ebé fornese durante Fevereiru 2013 hamutuk US$ 9,818.07. Enkuantu ba Marsu, montante ne’ebé relata mak US$ 8,336.90.
Montante rua ne’e hamutuk US$ 18,154.97, ne’ebé akuzasaun identifika nu’udar prejuízu ba Estadu RDTL. Iha 17 Janeiru 2014, LLG no DM lori kombustível gazoel no gasolina ba Unidade Patrulla Fronteira (UPF) iha Oecusse.
Tuir dokumentu, UPF simu gazoel 620 litru no gasolina 500 litru, maski fatura hatudu kuantidade total 3.000 litru.
Akuzasaun afirma katak kombustível restu uza atu enxe kareta sira. Iha 28 Janeiru 2014, BdJ, nu’udar Diretór Lojístika Nasionál, asina fatura fornecimentu kombustível ba PNTL UPF no UPF Oecusse.
Fatura ne’e iha valór US$ 4,500.00 no refere ba fornecimentu kombustível hosi kompania Ruvie Fuel Lda.
Akuzasaun mós refere katak, iha 2014, BdJ entrega senha kombustível ba LLG no DM, ne’ebé alegadamente fa’an senha sira ne’e. Osan ne’ebé apura durante produsaun prova hamutuk US$ 39,235.00.
Autoridade sira kaer sidadaun na’in tolu ne’ebé uza kupon atu sosa kombustível hosi LLG no DM. Durante busca iha uma arguidu sira, autoridade hetan senha kombustível folha 50, ho valór US$ 250.00.
Tuir akuzasaun, osan hosi fa’an senha kombustível sei uza atu selu eskola oan, renda uma no billete viajen ba Surabaya, Indonézia.
Ministériu Públiku akuza BdJ ba krime pekulatu, tuir Artigu 295 Kódigu Penál, no tráfiku influénsia. LLG no DM akuza ba krime pekulatu ho forma kontinuada.
Tribunal, depois avalia prova no deklarasaun sira, absolve BdJ no kondena DM. Desizaun ne’e marka rezultadu julgamentu ba kazu kombustível lakon ne’ebé envolve membru PNTL.
(ter)
