BAUCAU, STLTIMORLESTE.com – Projetu instalasaun eletrisidade ho orsamentu rihun US$ 105,370.96 ba Aldeia Uadaboru, Suku Guruca, Postu Administrativu Quelicai Antigu, Munisípiu Baucau, la kobre uma komunidade 100 resin.
Tuir dadus portal Munisípal Baucau Suku Guruça iha Aldeia lima mak hanesan Aldeia Eu-Afa rejistu uma kain 94, Fae-Ua uma kain 99, Laculela uma kain 152, Saebere uma kain 163 no Aldeia Uadaboru rejistu uma kain 110 iha neebe uma kain 110 iha Aldeia Uadaboru durante tinan naruk la asesu eletrisidade.
Relasiona problema nee, Xefe Suku Guruça, Filomeno Mendonça hateten katak, iha tinan liuba parte Autoridade Suku diriji proposta ba Eletrisidade Timor-Leste, Empreza Públika (EDTL.EP) atu halo instalasaun fiu eletrisidade ba komunidade sira iha Aldeia Uadaboru. Iha ne’ebé proposta ne’e enkaixa uma komunidade no uma lisan hamutuk 135 ne’ebé prezisa EDTL.EP atu responde, tanba tinan naruk durante ukun aan la asesu eletrisidade.
Nune’e iha tinan 2026 liuhusi politika Ministériu Obras Públikas (MOP) koloka kompaña Janicia Union, Lda, iha ne’ebé konsege hatudu progresu servisu, maibé la responde ba preokupasaun komunidade nian, tanba instalasaun fiu refere kobre de’it ba uma kain besik 60 iha Aldeia Uadaboru.
“Projetu eletrisidade ne’e agora daudaun instala ona ba parte uma, hein fiu koneksaun ba trafu, iha proposta ita halo ba 135 uma kain maibé iha ne’ebá parte kompaña ho EDTL ha’u hare’e instalasaun seidauk to’o 60,” hateten Filomeno ba STL iha Vila Nova Baucau, Tersa (20/10/2026)
Nia subliña, husi númeru 135 ne’ebé ajusta iha proposta, uma lisan sira labele hetan instalasaun fiu eletrisidade, tanba tauk risku, maibé uma komunidade nian balu ne’ebé inklui mos iha Bill of Quantities (BoQ) projetu instalasaun eletrisidade la hetan instalasaun.
Kona-ba tempu servisu tuir kontratu katak, parte kompaña sei termina servisu instalasaun fiu eletrisidade ba Aldeia Uadaboru to’o iha fulan Dezembru 2026, maibé Autoridade Suku komfirma katak, iha loron 26 Outubru ne’e, eletrisidade iha Uadaboru hahú lakan ona iha uma komunidade.
“Tuir informasaun ne’ebé ha’u hetan husi kompaña katak husi dia 26 too 28 ita bele dehan finadu ne’e lakan ona, ne’ebé ita hein to’ok,” Filomeno akresenta
Aliende Xefe Suku ne’e relata, husi proposta ne’ebé Autoridade Suku diriji ba parte EDTL projetu ne’e kobre distánsia kilometru lima neebe iha liña instalasaun diresaun ida ba Aldeia ba komunidade mistura husi Aldeia Saebere no Fae-Ua uma kain 10 resin, maibé parte kompaña la halo instalasaun fiu eletrisidade ba sira.
Nune’e preokupasaun hirak ne’e Autoridade Suku sei kordena ho parte kompaña no EDTL hodi fó solusaun ba komunidade hirak ne’ebé seidauk hetan instalasaun fiu eletrisidade husi projetu refere.
“Tanba instalasaun fiu entre uma ba uma sira halo hotu tiha ona, hein de’it ona fiu baisa ba koneksaun trafu ne’e mak seidauk, tanba rai lolon entaun sira agora halo hela prosesu ne’e,” Filomeno informa
Liga asuntu ne’e, STL tenta konfirma Xefe Unidade EDTL.EP Munisípiu Baucau, maibé lakohi fó komentáriu.
Entertantu Suku Guruça rejistu xefe família 618, ho totál populasaun 2586 kompostu mane 1284 no feto 1302.
(tom)
