DILI, STLTIMORLESTE.com – Fatin formasaun ba kadetes foun PNTL agora iha prosesu reabilitasaun, no estimasaun remata iha fulan Novembru ou Dezembru.
Komandante Sentru Formasaun PNTL, Superintendente Polísia Bazílio de Jesus hatete, Sentru Formasaun Polísia Nasionál Timor-Leste (PNTL) agora hala’o prosesu reabilitasaun ba fatin formasaun kadetes foun, atu prepara infraestrutura antes hahú treinamentu.
Nia esplika katak servisu reabilitasaun envolve Sentru Formasaun iha Komoro no fatin seluk ne’ebé sei uza ba formasaun ajente foun.
Aleinde iha Díli, servisu reabilitasaun mós hala’o iha Rairobo no Atabae, inklui iha kompanhia marítima iha Atabae.
Bazílio de Jesus informa katak, estimasaun servisu reabilitasaun sei remata iha fulan Novembru, maibé prosesu formasaun bele hahú iha Novembru ka Dezembro.
Nia deklara, ekipa kontratadu no ADN mós halo ona verifikasaun ba fatin sira ne’ebé tama iha prosesu reabilitasaun.
“Kompañia ne’ebé hetan kontratu no ADN tun ona atu verifika fatin sira ne’ebé sei uza ba formasaun,” hatete Komandante Sentru Formasaun PNTL, Superintendente Polísia Bazílio de Jesus ba jornalista sira iha Sentru Formasaun Polísia (SFP), Kuarta (21/10/2026).
Tuir nia, reabilitasaun ne’e importante atu garante katak infraestrutura no kondisaun sentru formasaun prepara di’ak antes simu kadetes foun sira.
Ho preparasaun ne’e, PNTL hein katak fatin formasaun sira bele prontu no oferese kondisaun adekuada ba prosesu treinamentu ajente foun sira.
(jen)
