DILI, STLTIMORLESTE.com – Estudante finalista nain 6 husi Eskola Sekundária Jerál Públika 5 de Maio Becora, Díli, la tuir ezame nasionál 2026, tanba razaun balun, inklui ba servisu iha rai li’ur, enkuantu estudante balun seluk nia situasaun seidauk iha informasaun klaru ba parte eskola.
Diretór ESGP 5 de Maio Becora, Julio Maia Castro de Jesus, hato’o informasaun ne’e ba STL, Kuarta-feira (21/10/2026).
“Ezame nasionál sei remata Kinta-feira aban, ho matéria Língua Tetun, depois kontinua ho ezame lokál. Ezame nasionál iha ami-nia eskola lao normal, maibé estudante nain 6 mak la partisipa. Razaun balun mak ba servisu iha rai li’ur, no balun to’o agora seidauk iha informasaun mai ami iha eskola,” nia komenta.
Nia esplika katak, total estudante finalista iha eskola ne’e hamutuk 348, maibé estudante nain 342 mak partisipa iha ezame nasionál, enkuantu estudante nain 6 seluk la tuir ezame.
Maski nune’e, Julio afirma katak prosesu ezame nasionál iha eskola ne’e lao di’ak no tuir oráriu ne’ebé determina ona. Estudante sira mai eskola tuir oras, tama ba sala no tuur atu hala’o ezame.
“Ezame nasionál lao di’ak, tanba estudante sira partisipa tuir oras ne’ebé determina ona. Dader sira mai eskola, tama sala no tuur atu bele hala’o ezame nasionál ho di’ak,” nia afirma.
Iha parte seluk, estudante Lidia da Costa dehan katak, kona-ba estudante sira ne’ebé la tuir ezame, parte eskola mak hatene liu razaun ne’ebé halo sira la partisipa iha momentu importante ne’e, tantu ezame nasionál nian no ezame lokál.
“Kona-ba maluk balun ne’ebé la tuir ezame, parte eskola mak bele hatene liu tanba saida mak sira la partisipa. Ezame ne’e tinan ida hala’o dala ida de’it, tanba ne’e ita labele lakon oportunidade di’ak ida ne’e,” nia dehan.
Entretantu, estudante João da Silva hateten katak, estudante sira tenke iha konsiénsia kona-ba tempu no oportunidade ne’ebé sira hetan durante tinan sira iha eskola. Tanba ne’e, bainhira to’o tempu ezame, estudante sira tenke partisipa atu bele remata sira-nia estudu iha nivel sekundáriu.
Nia subliña katak, susesu estudante ida-idak depende mós ba konsiénsia no responsabilidade pesoál atu aproveita oportunidade edukasaun ne’ebé iha.
(jac)
