DILI, STLTIMORLESTE.com – Servisu Edukasaun Munisipál (SEM) Manatuto submete ona lista professores na’in 21 ba Ministériu Edukasaun (ME) nasionál atu halo verifikasaun kona-ba mudansa no promosaun ba skalaun salariál, ne’ebé sei konsidera iha planu orsamentu tinan 2027.
Diretór Servisu Edukasaun Munisipál Manatuto, Luis Antonio Soares, hatete ba STL liuhusi telefone, Kuarta-feira (21/10/2026), katak lista ne’e inklui professores balun, liuliu sira ne’ebé uluk asume kargu xefia, atu Ministériu Edukasaun bele haree no konsidera sira-nia pozisaun iha prosesu planeamentu ba tinan oin mai.
“Iha professores balun ne’ebé mak iha asuntu ida-ne’e. Ministériu halo hela remunerasaun no promosaun ba skalaun sira, atu haree hamutuk no tau iha planu 2027. Lista ne’e mak foin dadaun ME nasionál husu ami atu haruka, liuliu ba kargu xefia sira ne’ebé uluk asume kargu,” Luis Antonio Soares afirma.
Nia esplika katak, profesores balun kestiona kona-ba mudansa ba promosaun no grau skalaun, tanba mudansa ne’e iha ligasaun ho salariu ne’ebé sira simu. Iha kazu balun, grau ka skalaun aumenta ona, maibé salariu seidauk reflete mudansa ne’e.
“Profesores na’in 21 ne’e mak ami lista no haruka ona ba Ministériu. Ami hakarak atu asuntu kona-ba sira-nia skalaun bele hetan verifikasaun no solusaun ne’ebé di’ak,” nia hatutan.
Iha parte seluk, Cornelio A. Soares hatete katak, informasaun klaru kona-ba skalaun salariál importante tebes atu professores sira bele hatene sira-nia pozisaun, nivel no salariu ne’ebé simu tuir tabela salariál.
“Agora daudaun ami laiha dadus klaru kona-ba ami-nia skalaun, tanba skalaun ne’e iha ligasaun ho salariu, tuir tabela salariál. Dala ruma ami rasik la hatene, derepente de’it mak hetan mudansa. Bainhira iha aumentu, ami presiza hatene hahú husi data ne’ebé, atu bele konfirma katak salariu tama ona no osan restu ne’ebé ami tenke simu sei iha ka lae,” Cornelio hatete.
Nia hatutan katak, dokumentu ofisiál kona-ba salariu, skalaun, nivel no tempu servisu importante atu sai prova ba professor ida-idak. Dokumentu ne’e bele ajuda professores sira bainhira halo rekerimentu ka presiza konfirmasaun kona-ba sira-nia direitu salariál iha futuru.
“Hau hakarak husu atu, se bele, iha dokumentu fixa ida atu rejista informasaun ne’e. Bainhira aban-bainrua ami presiza halo rekerimentu ruma, ami bele uza dokumentu ne’e hanesan prova. Durante ne’e, bainhira ami ba Rekursu Umanu, sira informa de’it katak ami-nia salariu no skalaun hanesan ne’e, maibé ami laiha dokumentu impressu atu bele haree,” nia dehan.
Enkuantu ne’e, Diretór Nasionál Rekursu Umanu iha ME, João Amaral, hatete katak Ministériu Edukasaun halo hela prosesu atu selu aumentu salariál ba professores na’in liu 3.000, besik 4.000, maibé pagamentu sei depende ba rezultadu verifikasaun no disponibilidade orsamentu.
“Prosesu pagamentu ba skalaun professores sira nian lao hela. Atu halo pagamentu bainhira, ida-ne’e sei depende ba disponibilidade orsamentu. Se orsamentu permite, ita bele halo pagamentu iha tinan ida-ne’e, ba professores na’in liu 3.000, besik 4.000,” João Amaral esplika.
Iha sorin seluk, professor husi Eskola Bázika Sentral (EBC) Fatumeta, Feliciano Gusmão, mos hato’o preokupasaun kona-ba skalaun salariál professores nian ne’ebé, tuir nia, seidauk hetan mudansa, maski pagamentu subsídiu transporte kada fulan kontinua lao normal.
“Hau haree katak subsídiu transporte lao normal hela, maibé kona-ba skalaun salariál, husi 2015 to’o agora seidauk iha mudansa,” Feliciano Gusmão afirma.
(jac)
