DILI, STLTIMORLESTE.com – Tribunal Judisiál Primeira Instánsia Dili (TJPID) hasai mandadu detensaun ba sasin Jeremias tanba rejeita asina notifikasaun tribunal nian.
Iha loron Kuarta, 21/10/2026, Juís prosesu Arjentino Nunes foti desizaun ne’e hafoin sasin Jeremias la kumpri notifikasaun atu marka prezensa iha audiénsia julgamentu kazu infantisídiu.
Ministériu Públiku, reprezenta husi prokuradór Bartolomeo de Araujo, husu tribunal atu hasai mandadu detensaun hodi garante sasin nia prezensa iha audiénsia tuirmai.
“MP husu Tribunal atu hasai mandadu detensaun, hodi asegura nia prezensa iha loron 27 fulan nee,” prokuradór Bartolomeo de Araujo deklara.
Defeza ne’ebé reprezenta arguida no arguidu la aprezenta opozisaun ba pedidu Ministériu Públiku nian. Tribunal depois deside adia audiénsia ba loron 27 fulan ne’e.
Audiénsia tuir mai sei kontinua ho rona deklarasaun husi sasin sira, inklui Jeremias, ne’ebé seidauk fó depoimentu iha prosesu julgamentu ne’e.
Tuir akuzasaun, arguida R halo hahalok ne’ebé kauza mate bebé tanba hetan ameasa husi arguidu F, ne’ebé nia namoradu. Ministériu Públiku akuza sira nu’udar koautór materiál krime infantisídiu, iha forma konsumada, tuir Artigu 142.º Kódigu Penál.
Iha deklarasaun iha tribunal, arguida dehan katak arguidu ameasa arguida. Arguida mós afirma katak nia subar kondisaun isin-rua tanba ta’uk atu fó hatene ba família.
Arguida esplika katak, bainhira nia sente moras partu, nia koko kontaktu arguidu, maibé telefone la simu. Nia dehan bebé moris no tanis uluk, maibé depois para dada-iis.
Tuir arguida nia deklarasaun, nia tau bebé nia isin iha plastik no lori atu soe iha mota. Loron rua depois, polísia ba foti nia iha uma.
Arguida hatudu arrependimentu ba hahalok ne’ebé nia komete. Tribunal adia audiénsia atu kontinua rona deklarasaun husi husi asin sira.
Prosesu julgamentu ne’e prezididu husi juís kolektivu Arjentino Nunes, Ivan Patrocenio no Yudi Pamukas. Ministériu Públiku reprezenta husi prokuradór Bartolomeo de Araujo, enkuantu defeza reprezenta husi defensór públiku Sergio Dias Quintas no Fransisco.
(ter)
