DÍLI, STLTIMORLESTE.com — Selesaun Nasionál Timor-Leste Sub-15 sei hasoru Azerbaijaun, hanesan nasaun organizadór, iha jogu abertura FIFA U-15 World Cup & Festival 2026, ne’ebé sei hala’o iha Baku, Azerbaijaun, iha loron 24 Outubru 2026, tuku 19:30, oras lokál.
Treinadór Miro Baldo Bento mak lidera seleksaun joven Timor-Leste ne’e no kompetisaun internasionál ne’e sei sai esperiénsia importante ba jogadór sira atu dezenvolve kapasidade no hetan esperiénsia hasoru ekipa husi nasaun seluk.
Timor-Leste tama iha grupu ida ho Azerbaijaun, Andorra, Austrália, Haiti no Israel. Depois jogu abertura hasoru Azerbaijaun, Timor-Leste sei hasoru Haiti iha oras 8:45 no Andorra iha oras 15:30 iha loron 25 Outubru no oras Azerbaijaun nian, tuir mai Timor Leste hasoru Austrália ho oras 07:30 no Israel ho oras 15:30 iha loron 26 Outubru 2026.
Kompetisaun ne’e sei uza sistema jogu 8 kontra 8, ho jogadór na’in-8 iha kada ekipa no parte rua, kada ida minutu 20. Formatu ne’e diferente husi jogu futebol tradisionál 11 kontra 11.
FIFA U-15 World Cup & Festival 2026 sei hala’o husi 22 to’o 30 Outubru. Objetivu importante husi kompetisaun ne’e mak fó oportunidade ba joven sira atu hetan esperiénsia internasionál, aprende estilu jogu oioin no dezenvolve futuru futebol iha sira-nia nasaun.
(leo)
