DÍLI, STLTIMORLESTE.com — Ekipa voleibol mane Choque hetan vitória ho rezultadu 3–0 hasoru Matebian, iha kompetisaun Liga Voleibol Timor-Leste Primeira Divizaun, 7.º Époka 2026, iha Ginásio Desportu Dili, Kuarta-feira, 21/10/2026.
Iha jogu ne’e, Choque hatudu dominasaun iha parte tolu, maski Matebian fó rezisténsia maka’as liuliu iha parte dahuluk, ne’ebé ekipa rua troka pontu ho diferensa ki’ik.
Iha parte dahuluk, Choque manan Matebian ho rezultadu 25–22. Matebian hahú ho vantajen iha pontu balu, maibé Choque kontinua hamenus distánsia no konsege muda situasaun iha pontu importante sira, to’o remata parte ho vitória 25–22.
Iha parte daruak, Choque kontinua hatudu forsa no manan ho rezultadu 25–15. Choque hahú ho vantajen 4–0 no kontinua aumenta pontu, maski Matebian koko atu responde. Choque mantein kontrolu jogu no taka parte daruak ho diferensa pontu 10.
Iha parte datoluk, Choque manan tan ho rezultadu 25–17. Choque hahú ho vantajen 3–0 no kontinua lidera durante jogu, maski Matebian koko atu hamenus diferensa. Ho rezultadu ne’e, Choque taka parte datoluk no manan partida tomak ho rezultadu 3–0.
Durante kompetisaun, apoiantes no simpatizantes husi ekipa rua fó motivasaun ba sira-nia jogador. Sira hakilar no fó apoiu bainhira jogador sira aumenta pontu, ne’ebé ajuda kria ambiente animadu iha pavilhaun desportu.
Rezultadu ne’e hatudu katak Choque konsege uza oportunidade iha momentu importante, liuliu iha parte daruak no datoluk. Enkuantu Matebian hatudu rezisténsia iha parte dahuluk, ekipa ne’e seidauk konsege ultrapasa dominasaun Choque iha parte tuirmai.
Vitória 3–0 ne’e fó rezultadu pozitivu ba Choque iha kompetisaun Liga Voleibol Timor-Leste Primeira Divizaun, 7.º Époka 2026.
(leo)
