DÍLI, STLTIMORLESTE.com – Polísia Nasionál Timor-Leste (PNTL) simu apoiu adisionál husi Governu Austrália hodi hametin kapasidade operasionál, dezenvolve rekursu umanu no hadi’a seguransa públika.
Komandante Jerál PNTL, Komisáriu Asistente Polísia Afonso dos Santos hato’o boas-vindas ba Ministru Defeza Austrália, Hon. Richard Marles, no delegasaun, iha serimónia inaugurasaun Sentru Operasaun Nasionál PNTL, iha Díli, Kinta-feira (22/10/2026).
Afonso dos Santos hatete katak, serimónia ne’e la’ós de’it atu inaugura sentru operasaun, maibé mós atu anunsia apoiu adisionál husi Governu Austrália ba PNTL.
“Ne’e signifika kompromisu atu hametin seguransa no dezenvolve amizade ne’ebé metin entre Timor-Leste ho Austrália,” nia hatete ba jornalista sira iha Komandu Jerál PNTL.
Nia apresia kooperasaun entre PNTL, Polísia Austrália no Programa Dezenvolvimentu Polísia Timor-Leste (TLPDP), ne’ebé durante tinan barak fó asisténsia téknika ba PNTL.
“Operasaun ida-ne’e hametin kapasidade institusionál, dezenvolve pesoál no harii relasaun profisionál bazeia ba konfiansa,” nia esplika.
Afonso dos Santos afirma katak, kooperasaun ne’e reflete respeitu malu no kompromisu komún atu garante seguransa públika no kumpre lei.
Iha serimónia hanesan, Ministru Defeza Austrália, Richard Marles, deklara katak Austrália orgullu atu sai parseiru ba Timor-Leste, liuliu iha dezenvolvimentu kapasidade PNTL.
Nia hatete katak, Primeiru-Ministru Timor-Leste no Austrália hahú ona kompromisu kooperasaun iha inísiu tinan 2026.
“Loron kotuk ami asina akordu kooperasaun iha área defeza, atu hasa’e kapasidade Forsa Defeza, no agora ami kontinua apoiu atu dezenvolve kapasidade PNTL,” nia deklara.
Marles esplika katak, apoiu Austrália sei kontribui ba dezenvolvimentu kapasidade seguransa marítima, seguransa sibernétika no preparasaun atu responde ba dezastre naturál.
Nia hato’o agradese ba pesoál sira ne’ebé servisu atu kontribui ba dezenvolvimentu Timor-Leste, no afirma katak Austrália hakarak kontinua hametin parseria entre nasaun rua.
Komandante TLPDP, Darren Boy mós hatete katak, investimentu Austrália ne’ebé aumenta sei permite programa ne’e kontinua servisu hamutuk ho PNTL.
Nia esplika katak, objetivu mak atu dezenvolve kapasidade operasionál PNTL ne’ebé luan, avansadu no integradu liután, inklui sistema rede ne’ebé suporta operasaun polísia.
Darren Boy afirma katak, kompromisu Austrália mak atu asegura PNTL hetan ekipamentu no kapasidade nesesária atu responde ba dezafiu seguransa iha tempu agora no futuru.
Nia hatutan katak, apoiu ne’e importante atu suporta kresimentu Timor-Leste iha lideransa rejionál, dezenvolvimentu no preparasaun atu hala’o papel iha ASEAN iha tinan 2029.
“Ba parseiru sira iha PNTL, ami agradese imi-nia profisionalizmu, kompromisu no vizaun atu harii futuru ne’ebé seguru liu ba ema hotu,” nia remata.
(jen)
