DILI, STLTIMORLESTE.com – Sekretaria Estadu ba Igualdade (SEI) organiza atividade tiru amizade entre feto Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hodi komemora Loron Nasionál Feto ba dala-50.
Atividade ne’e hala’o iha Karreira Tiru, Sentru Instrusaun Komandante Nicolau Lobato, Metinaro, iha sexta-feira, 23 Outubru 2026, ho objetivu hametin solidariedade no kooperasaun entre instituisaun rua.
Vise-Ministra Solidariedade Sosiál no Inkluzaun, Céu Brites, ne’ebé reprezenta Sekretária Estadu ba Igualdade, Elvina Sousa Carvalho, loke diretamente atividade ne’e.
Atividade ne’e mós fó apresiasaun ba kontribuisaun feto Timor-Leste durante tinan 50 iha luta libertasaun nasionál no prosesu dezenvolvimentu nasaun.
Aleinde ne’e, atividade refere promove igualdade jéneru no empoderamentu feto iha setór defeza no seguransa, tuir Planu Asaun Nasionál ba Rezolusaun 1325 kona-ba Feto, Pás no Seguransa.
Tiru amizade ne’e la’ós kompetisaun atu buka vitória, maibé sai nu’udar espasu atu fahe esperiénsia no demonstra kapasidade, disiplina no profisionalizmu membru feto PNTL no F-FDTL.
Iha okaziaun ne’e, reprezentante Xefe Estadu-Maior Jenerál F-FDTL, Koronel Guido Oliveira “Kuitadu”, afirma katak feto Timor-Leste sei kontinua luta atu hetan igualdade no inkluzaun.
Koronel Guido Oliveira, ne’ebé mós Xefe Gabinete Koordenadór Órgaun Apoiu V-CEMGFA, subliña katak F-FDTL no PNTL prontu atu apoia luta feto nian.
Nia mós apela ba instituisaun rua atu hametin kooperasaun, fahe esperiénsia no konsolida kultura respeitu, disiplina no integridade iha servisu ba populasaun.
“Ha’u halo apelu atu F-FDTL no PNTL tau hamutuk esforsu, fahe esperiénsia no konsolida kultura respeitu, disiplina no integridade,” hateten Koronel Guido Oliveira.
Nia subliña katak kooperasaun entre instituisaun rua importante atu hametin efikásia no kredibilidade Estadu, nune’e mós kontribui ba estabilidade interna no imajen Timor-Leste iha nivel internasionál.
“Kooperasaun entre instituisaun rua ne’e nu’udar kondisaun ba efikásia no kredibilidade Estadu nian,” afirma Koronel Guido Oliveira.
Tuir nia, instituisaun ne’ebé koezivu, inkluzivu no hetan respeitu hosi populasaun bele hametin estabilidade interna no hatudu kompromisu Timor-Leste nian iha nivel internasionál.
Atividade tiru amizade ne’e integra programa komemorasaun Loron Nasionál Feto ba dala-50, ne’ebé sei selebra iha 3 Novembru 2026.
Selebrasaun tinan ne’e lori lema “Feto Timor Sei La Rende no Sei Luta Nafatin To’o Hetan Igualdade no Inkluzaun”.
Serimónia ne’e hetan partisipasaun hosi reprezentante SEI, F-FDTL, Segundu Komandante PNTL, membru Parlamentu Nasionál, reprezentante unidade militár, parseiru dezenvolvimentu nasionál no internasionál, no membru PNTL no F-FDTL.
(eme)
