LAUTÉM, STLTIMORLESTE.com – Sentru Turizmu Komunitáriu Ete Hasa Lepek iha Suku Com, Postu Administrativu Lautém, Munisípiu Lautém, ne’ebé to’o agora abandona, Autoridade Munisípal Lautém, planeia ona atu kontinua dezenvolve.
Prezidente Autoridade Munisípiu Lautém, Melio de Jesus, hateten katak Governu aloka orsamentu iha tinan 2022 dezenvolve Ete Hasa Lepek sai sentru turizmu komunitáriu, tanba fatin ne’e iha valor istóriku, liuliu durante luta rezisténsia, bainhira atual Primeiru-Ministru (PM), Kay Rala Xanana Gusmão, uza fatin refere ba enkontru.
Maibé, hafoin remata konstrusaun uma sira Governu entrega sentru turizmu ne’e ba komunidade atu jere, maibé la lao tuir esperansa, tanba komunidade enfrenta limitasaun finanseira, falta eletrisidade no kondisaun estrada ne’ebé aat husi Portu Com ba sentru turizmu ne’e.
“Fatin ne’e konstrui iha Governu anterior nia tempu, maibé entrega fali ba komunidade atu jere. Komunidade laiha kapasidade orsamentu, tanba ne’e mak agora abandona,” Melio de Jesus dehan ba jornalista sira iha Com, Sábadu (24/10/2026).
Nia esplika katak kondisaun estrada ne’ebé aat sai obstákulu ba asesu vizitante sira ba sentru turizmu ne’e, enkuantu falta eletrisidade mós limita oportunidade atu dezenvolve servisu turizmu no atividade ekonómika ba komunidade lokál.
Atu responde ba problema hirak ne’e, Autoridade Munisípiu Lautém planeia ona sei koordena empreza balu hodi reabilita estrada husi Portu Com ba Ete Hasa Lepek, nune’e bele fasilita asesu vizitante sira ba fatin turizmu istóriku ne’e.
Enkuantu kona-ba eletrisidade, Melio de Jesus informa katak Governu, liuhusi Sekretáriu Estadu Eletrisidade, iha planu eletrifikasaun nasionál, no espera katak implementasaun bele hala’o iha tempu badak.
“Entretantu, kona-ba estrada, ita sei hein reabilitasaun estrada Lautém–Com, depois ita bele planeia kontinua ba fatin ne’ebá,” nia argumenta.
Sentru Turizmu Komunitáriu Ete Hasa Lepek iha potensia atu sai destinasaun turístika ho valor istóriku no bele kontribui ba ekonomia komunidade lokál. Maibé, falta infraestrutura bázika no limitasaun kapasidade jestaun komunidade kontinua sai dezafiu ba operasaun no dezenvolvimentu fatin ne’e.
(tom)
