DILI, STLTIMORLESTE.com – Konflitu entre grupu joven sira iha Aldeia Ouroma, Suku Cotamuto, Luro, Lautém, rezulta joven mane ida mate no ema na’in rua kanek.
Husi vítima na’in rua ne’ebé kanek, ida sofre kanek grave, enkuantu ida seluk sofre kanek kmaan. Autoridade lokál seidauk konfirma kauza no kronolojia kompleta husi akontesimentu ne’e.
Komunidade Suku Cotamuto, Herminha dos Santos, konfirma katak konflitu ne’e akontese iha Aldeia Ouroma, maibé kauza konflitu seidauk klaru.
“Deskónfia konflitu entre grupu joven sira. Ema ida mate, ida kanek grave no ida seluk kanek kmaan,” Herminha hatete.
Nia fó deklarasaun ne’e ba jornalista STL liuhusi telefone, iha sábadu (24/10/2026).
Herminha esplika katak vítima ida mate iha dalan, bainhira família transporta nia husi Lospalos ba Hospital Referál Baucau, tanba sofre kanek grave.
Entretantu, vítima na’in rua ne’ebé kanek hetan tratamentu médiku iha Hospital Referál Baucau.
Iha parte seluk, Xefe Suku Cotamuto, António Sarmento Soares, konfirma akontesimentu ne’e, maibé admite katak seidauk hetan informasaun kompleta kona-ba kauza no kronolojia konflitu.
“Ha’u rona katak konflitu akontese, maibé ha’u seidauk hatene ho klaru kronolojia akontesimentu ne’e,” António deklara.
Nia esplika katak, depois rona informasaun kona-ba joven sira baku malu, komunidade bá haree fatin akontesimentu, enkuantu polísia mós to’o atu lori vítima sira ba ospitál.
António hatutan katak nia seidauk bele fó informasaun detallada kona-ba kazu ne’e, tanba seidauk hetan dadus kompletu husi autoridade kompetente.
Nia promete atu fó informasaun adisionál bainhira hetan dadus ne’ebé klaru kona-ba kronolojia no kauza konflitu ne’e.
(jen)
