LAUTÉM, STLTIMORLESTE.com – Komando Polísia Munisípiu Lautém detein ona ema na’in haat (4) ba kazu asaltu malu iha Suku Cotamuto, Postu Administrativu Luro, Munisípiu Lautém, ne’ebé rezulta ema na’in ida mate no ema seluk rua hetan kanek.
Komandante Komando Polísia Munisípiu Lautém Lautém, Superintendente Xefe Polísia António Rego Fernandes, hateten katak insidente ne’e akontese iha Sesta (23/10/2026), besik tuku 17:00 lokraik.
Nia esplika katak vítima sira ne’ebé hetan kanek mak hanesan, Francisco Vila Nova hetan kanek kmaan, Eusebio hetan kanek todan, no Silo hetan kanek grave. Nune’e atuasaun Polísia nian iha fatin akontese kontaktu ambulánsia transporta vitima ba Hospitál Rejionál Eduardo Ximenes (HoREX), Baucau, maibé vítima Silo hakotu iis iha dalan. Enkuantu Eusebio, to’o agora kontinua hetan tratamentu iha HoREX.
Relasiona ho mate, Servisu Investigasaun Kriminál hamutuk ho Polísia Eskuadra Postu Luro, halo kedas koordenasaun ho família matebian, transporta mate isin ba Hospitál Nasionál Guido Valadares (HNGV) atu submete ba prosesu autópsia.
António Rego Fernandes konfirma katak família matebian konkorda ona atu hala’o autópsia, no autoridade sira kontinua hein rezultadu hodi determina kauza mate.
“Suspeitu sira ita kaptura kedas iha kalan ne’ebá, ho flagrante delitu, no asegura ona iha sela detensaun Komando Munisípiu Lautém,” António Rego Fernandes hateten ba jornalista sira iha Com, Sábadu (24/10/2026).
Nia esplika katak konflitu hahú hosi provokasaun entre pesoal ho pesoal, ne’ebé ikus mai hamosu asaltu malu no rezulta vítima balu mate no kanek.
Polísia deskonfia vítima mate tanba sona
Komando Polísia Munisípiu Lautém Lautém konsidera kazu ne’e hanesan omesídiu agravadu no kazu arma branka, tanba iha deskonfiansa katak Silo mate tanba kanek sona. Maibé, kauza mate sei depende ba rezultadu autópsia no investigasaun ne’ebé hala’o hela.
“Tuir informasaun ne’e, tanba sona, nune’e kazu ne’e ita konsidera hanesan omesídiu agravadu no kazu arma branka,” António afirma.
Nia hatutan katak, to’o agora, polísia seidauk simu relatóriu kompletu hosi ekipa iha terrenu kona-ba fatin exatu ne’ebé vítima hetan sona.
“Ha’u seidauk hetan relatóriu serteza hosi terrenu. Maibé ita haree ran sai maka’as hosi nia isin. Ita hein prosesu autópsia, depois mak ita bele hatene fatin ne’ebé nia hetan sona no kauza mate,” nia informa.
Komando Polísia Munisípiu Lautém entrega ona kazu ne’e ba Servisu Investigasaun Kriminál atu kontinua prosesu investigasaun, inklui hein rezultadu autópsia hodi klarifika sirkunstánsia no kauza mate.
António Rego Fernandes mós hateten katak, tuir identifikasaun inisiál hosi polísia, kazu ne’e envolve membru arte marsiál sira no sidadaun sira ne’ebé la’ós membru arte marsiál.
(tom)
